Ina lescha che sa basa sin prognosas
Per decider quantas reservas da terren da construcziun ch’ina vischnanca dastga avair, èn prognosas davart il svilup da la populaziun in impurtant instrument. Era sche la Confederaziun prognostitgescha in pli grond augment da la populaziun per il chantun Grischun che avant tschintg onns, pon unicamain singulas vischnancas profitar. Ina da quellas è Ilanz/Glion.
«Il svilup da la populaziun è da gronda impurtanza per exequir il dretg federal davart la planisaziun dal territori.» Quai ha l’Uffizi per il svilup dal territori dal chantun Grischun (UST) scrit il settember 2025 a las vischnancas grischunas. E l’uffizi ha en la medema brev fatg attent che la Confederaziun haja actualisà las perspectivas demograficas per il chantun Grischun l’avrigl 2025. Visavi a las perspectivas da l’onn 2020 prognostitgescha l’Uffizi federal da statistica per il chantun Grischun in augment pli grond da la populaziun grischuna, fa l’UST a savair.
Las prognosas èn impurtantas
En sia brev a las vischnancas fa l’UST attent ch’ils scenaris demografics sajan da muntada fundamentala per definir las zonas da construcziun futuras per las vischnancas. L’uffizi circumscriva trais lieus dal dretg federal nua ch’il principi dal svilup da la populaziun è giuridicamain liant per definir il basegn dal terren da bajegiar. «La dumonda, sch’igl è raschunaivel da colliar sin plaun legislativ ils scenaris demografics cun il basegn da zonas da construcziun u betg, na po betg vegnir respundida qua. Questa discussiun sto avair lieu ordaifer dal sectur d’activitad da noss uffizi », scriva l’UST en la brev.
Cun ordaifer da ses uffizi manegia il schef da l’UST Richard Atzmüller ina discussiun politica necessaria per midar las reglas da gieu per sclerir las zonas da construcziun futuras. El sez vesa in problem per las vischnancas, sche la Confederaziun publitgeschia mintga tschintg onns novas prognosas. Il Chantun è gia stà avant tschintg onns da l’avis che las perspectivas federalas per il svilup da la populaziun grischuna sajan memia pessimisticas. «Perquai avain nus lura era publitgà atgnas perspectivas», di Richard Atzmüller. Da quellas che correspundian per gronda part a las novissimas da la Confederaziun.
Effect positiv per Ilanz/Glion
Per la vischnanca dad Ilanz/Glion han las novas perspectivas dal svilup da la populaziun en scadin cas in effect positiv. Sco quai ch’il manader da planisaziun e construcziun communal Andreas Pfister ha ditg ils 11 da mars 2026 a la FMR possia la vischnanca dad Ilanz/Glion pli u main desister da dezonar parcellas da construcziun. La vischnanca vegnia perquai a reponderar sia revisiun totala da la planisaziun.
Che anc autras vischnancas grischunas sappian sin fundament da las novas prognosas demograficas dezonar damain terren da construcziun, na po Richard Atzmüller betg dir. Ses uffizi ha la finala da controllar che las planisaziuns communalas sa cumportian cun las pretensiuns da la lescha. En la brev a las vischnancas cusseglia l’UST da sa drizzar cun dumondas davart la planisaziun locala a las planisadras ni als planisaders cirquitals da las atgnas vischnancas. Richard Atzmüller di che la plipart da la populaziun grischuna creschia tenor prognosa en il futur per gronda part en lieus che prospereschian gia ussa.
Chantun lascha prognostitgar
Las prognosas per il svilup da la populaziun furnescha la Confederaziun sulettamain per l’entir chantun. Il chantun Grischun ha surdà al biro da planisar Wüest e partenaris SA da far las prognosas demograficas per mintga singula vischnanca grischuna sin fundament da las cifras federalas. In proceder relativamain cumplitgà, sco quai che la metodica publitgada sin la pagina da l’UST tradescha. Tenor indicaziun da l’interpresa sa basan lur prognosas sin indicaziuns da naschientschas, mortoris e migraziun che vegnian prolungadas en l’avegnir ed enritgidas cun dumondas da bajegiar e midadas da domicil per numnar intgins dals impurtants criteris.
Ils spezialists da la Wüest SA èn da l’opiniun che la populaziun grischuna creschia be a moda modesta ils proxims 15 onns, per 0,26 % per onn. Il pli fitg vegnia quai ad esser il cas en l’intschess da Maiavilla ed en il conturn da Roveredo. La dinamica da crescher sa reducescha dentant fitg, perquai che pli paucas persunas immigreschan en il Grischun e perquai che las naschientschas tschessan. La vischnanca dad Ilanz/Glion è en quel scenari in zic in’excepziun. Ils prognostichers vesan ina cuntinuada carschen da la populaziun dad Ilanz/Glion dad actualmain 5100 persunas sin passa 5600 fin l’onn 2040. Las prognosas dal 2020 n’èn betg stadas disponiblas.
Gust da leger dapli?