Mandat lucrativ rumantsch
Probabel èsi il mandat il pli lucrativ en Rumantschia. Il president da la SRG.R survegn indemnisaziuns da passa 50 000 francs. La fin da matg vegn il post occupà da nov. La suprastanza vul far ina proposta. Il davos pled en chapitel ha la radunanza generala.
Igl è cumplitgà e la confusiun è programmada. Las structuras sparpagliadas da la SRG èn grevas da chapir. Tar l’interpresa da medias tutga tranter auter RTR che emetta mintga di programs rumantschs da radio ed emissiuns da televisiun. Sco dacurt rapportà (guarda LQ dals 12 da mars) tschertga RTR in nov directur u ina nova directura – la successiun da Nicolas Pernet.
Ma anc in auter impurtant mandat èsi d’occupar quest onn en la part rumantscha da la SRG. Igl è il presidi da l’uniun SRG.R. Dapi il 2019 è Vincent Augustin a la testa da questa uniun. Damai ch’el cumplenescha quest onn 70 onns, sto el chalar la fin da l’onn. Gliez è definì en ils statuts.
L’uniun SRG.R ha var 1000 commembers e commembras. E pertge è il presidi da questa uniun in post interessant? Fitg simpel: El porscha gronda influenza, sche betg perfin pussanza. En pli èsi in dals pli lucrativs mandats, sche betg perfin il pli lucrativ, en Rumantschia.
Influenza sin RTR
L’uniun SRG.R descriva sasezza sin sia pagina d’internet sco purtadra dad RTR. La suprastanza da questa uniun ha in pled en chapitel, sch’i va per tscherner il directur ed il schefredactur dad RTR. Ella propona, tgi che duai occupar quests dus posts cardinals.
Il president Vincent Augustin, che maina la suprastanza, ha perquai ina pulita influenza, sch’i va per decider, tgi che daventa successur u successura dal directur partent dad RTR.
Pussanza entaifer la SRG
Il president dad SRG.R ha dentant anc ina segunda funcziun. El sesa automaticamain gist anc en il cussegl d’administraziun da l’entira SRG. Quest gremi da nov persunas, che vegn da preschent timunà da Jean-Michel Cina, posseda pussanza.
En ils statuts èsi scrit ch’il cussegl d’administraziun «determinescha la strategia da l’interpresa». Cun auters pleds: Las nov persunas – tranter quellas l’advocat surmiran Vincent Augustin – decidan en tge direcziun ch’il gigantic bastiment da medias SRG navighescha.
Elecziun a Glion
Tgi che survegn a partir dal 2027 il post da Vincent Augustin, dastgan ils commembers e las commembras dad SRG.R decider. La radunanza generala ha lieu ils 30 da matg 2026 en la sala da la casa cumin a Glion.
La suprastanza haja l’intenziun da preschentar ina proposta per in nov president u ina nova presidenta, hai num tar il secretariat da l’uniun sin dumonda da la FMR. Ma en sasez ha mintga commember il dretg da proponer insatgi.
Pauschala, onurari, spesas e diarias
Damai ch’il mandat è cumbinà cun duas funcziuns, datti era duas indemnisaziuns per il presidi.
Per l’ina paja l’uniun SRG.R a ses president ina «pauschala» annuala. En il rapport annual dal 2024 summa questa pauschala a 16 200 francs.
Per l’autra survegn il president sco commember dal cussegl d’administraziun da la SRG in onurari da 32 000 francs. Funcziuns spezialas vegnan anc pajadas extra. En quest onurari n’èn las diarias anc betg cumpraisas. Tenor rapport annual dal 2024 datti per mintga sesida 1000 francs. Vitiers vegnan anc circa 3000 francs per spesas.
Tut en tut vegnan las duas funcziuns dal presidi da SRG.R remuneradas cun passa 50 000 francs l’onn.
Gust da leger dapli?