Lectura Rumantscha

In post lucrativ en Rumantschia

Posts per Rumantschas e Rumantschs datti sco crappa en uniuns, instituziuns ed organisaziuns da tuttas sorts. Uschè interessant – almain ord vista finanziala – sco quel dal presidi da la SRG.R èn dentant paucs. Sco presidenta da questa uniun pos ti quintar cun ina paja da passa 50 000 francs l’onn. Da chattar in successur u ina successura per il president partent Vincent Augustin na stuess pia betg esser in problem. Lez sto dal reminent chalar, perquai ch’el cumplenescha quest onn ses 70avel.

La Mona Lisa da Trun

Trun empè da Paris. Cuort Ligia Grischa empè dal Louvre. Carigiet empè da da Vinci. Tuttina è la «Cratschla sin fanestra» in pau sco la Mona Lisa. Almain quai che reguarda l’exposiziun actuala en la Cuort Ligia Grischa, sco ch’ils curaturs han punctuà a chaschun da la vernissascha. Quest’ovra da Carigiet è numnadamain exponida per l’emprima giada a Trun ed è damai in dals puncts culminants da l’exposiziun deditgada ad ovras temprivas d’Alois Carigiet e da Matias Spescha.

Tschiel blau a Scuol

Turnar anc ina giada en sia patria a Scuol, quai è stà il grond siemi dad Annatina Filli, anteriura redactura da la FMR. Senza l’agid da l’organisaziun «A Million Dreams» na fiss quai dentant betg stà pussibel. Annatina Filli patescha d’ina malsogna da Parkinson atipica ed abita a Scharans en in’instituziun per persunas cun impediments. Grazia al sustegn ha ella dentant pudì far il viadi a Scuol e giudair là il tschiel blau en cumpagnia da famiglia ed amias.