Candidar cun la cuschina alpina

Ils pajais da la Frantscha, Italia, Slovenia e da la Svizra han inoltrà quest glindesdi da cuminanza la candidatura per ch’il «Patrimoni alimentar alpin» – per uschè dir la «cuschina alpina» – daventia patrimoni da l’UNESCO. La Svizra coordinescha questa candidatura, sco che l’Uffizi federal da cultura (UFC) ha communitgà.

Cun quai surpiglia la Svizra per l’emprima giada insumma la coordinaziun per ina tala candidatura per il register da l’UNESCO. Vi da l’iniziativa multinaziunala sa mussian las furmas da collavuraziun «ch’èn sa sviluppadas en l’artg alpin», ha scrit l’UFC en sia communicaziun da glindesdi.

Tar il patrimoni alimentar alpin tutgan tenor descripziun pliras tecnicas e praticas duvradas en l’alimentaziun alpina, sco p.ex. da chaschar sin las alps, dad elavurar il graun al paun, da racoltar plantas selvadias, da tgirar curtins da pumera tradiziunals e da mantegnair l’apicultura en muntogna. Tenor l’UFC represchentan questas praticas «in patrimoni viv ch’è collià stretgamain cun la cuntrada, cun sistems agriculs e cun la moda da viver en las cuminanzas alpinas».

Il dossier da candidatura vegn uss examinà. Cun la decisiun n’èsi betg da far quint avant il december 2027, sco che l’UFC ha fatg a savair. (sda/fmr)