Sin buna via da cumpletar la suprastonza communala
Ils 14 da zercladur 2026 cumpletescha Medel sia suprastonza communala. Suenter la decisiun d’augmentar quella da treis sin tschuns dels, ston duas ni dus commembers vegni elegi ell’executiva. Ella persuna da Ciril Lutz eis ei reussiu d’anflar in candidat, cun in ulteriur ein ins en discussiun.
«Per las elecziuns communalas supplementaras per la perioda d’uffeci 2026/29 vegn la nova constituziun communala, approbada dil pievel ils 30 da november 2025, applicada. Muort quella midada – alzament dalla suprastonza communala da treis sin tschun persunas – vegn menau atras l’elecziun tenor artechel 68a dalla constituziun communala.» Cun quei scriver ei la suprastonza communala da Medel sedrizzada al pievel medelin ils 10 da fevrer 2026.
Forsa aunc ina dunna
Entochen ils 27 da mars 2026 ha ella dau la pusseivladads da far propostas per candidatas e candidats da gerau. Igl appel, respectivamein las discussiuns, ha purtau fretg. «In candidat ei definitivs, cun in ulteriur essan nus en discussiun», di il president communal Claudio Simonet. Sco el ha detg sin damonda dalla FMR ei Ciril Lutz che habitescha a Matergia, sedeclaraus promts da star a disposiziun per l’elecziun ell’executiva ils 14 da zercladur 2026. «La gliesta dallas persunas ch’ein vegnidas en damonda sco geraua ni gerau ha cunteniu rodund 30 nums. Ussa sperein nus ch’ei reusseschi d’anflar definitivamein la secunda persuna, forsa schizun ina dunna», di Claudio Simonet. Spel president communal Claudio Simonet sesan il mument aunc Corsin Flepp e Lucas Venzin ella suprastonza communala.
Dus ulteriurs l’auter onn
Per ademplir la constituziun communala drova Medel quest onn dus ulteriurs commembers dalla suprastonza communala. Lu fuss il quorum da tschun contonschius. Mo gia en in onn vegn la vischnaunca a stuer ir alla tscherca da dus ulteriurs, pertgei ton il president communal Claudio Simonet sco il gerau Corsin Flepp han annunziau lur demissiuns. «Nus havein il mument giuvnas e giuvens fetg engaschai en vischnaunca. Ei ha dau ina dinamica, quei ch’ei empermettent, jeu sun da buna speronza. Per quei motiv sun jeu perschuadius ch’ei reussescha d’anflar quels dus candidats. Forsa savess ei esser empau pli grev d’anflar la persuna ch’ei promta da surprender il presidi», di Claudio Simonet.
«Ins lai dumandar»
Anflar candidatas e candidats per mandats politics ei buca sempel en vischnauncas grondas, nundir en pintgas sco Medel. «Ins sa bein far ina publicaziun en fuorma d’in appel d’annunziar igl interess, mo sin in tal reaghescha la glieud buca. Zaco regia ina retenientscha da dir: jeu stun a disposiziun. Ins lai bugen dumandar, forsa era per veser ch’ins fuss habels d’ademplir in post da geraua ni gerau. Eventualmein drova ei semplamein aunc quei impuls», constatescha Claudio Simonet. Schebein il termin d’annunzia per candidatas e candidats vegn prolunghius ussa, damai ch’ina secunda ni in secund candidat ei aunc buca definitivs, ha il president communal buca saviu dir: «Dapi ch’il termin ei spiraus havein nus aunc buca giu seduta dalla suprastonza communala.»
Gust da leger dapli?