Scuvrir misters e furmer l’avegnir

Dals 9 fin als 11 avrigl 2026 ho lö a Samedan illa halla polivalenta Promulins darcho l’exposiziun per imprender a cugnuoscher misters cul nom «Fiutscher Grischun dal Süd». Giuvenils, genituors, scoulas scu eir tuot las persunas interessedas sun, scu cha’ls organisatuors scrivan als mezs d’infurmaziun, invidedas da gnir a cugnuoscher la multifarieted dals misters cha’s po imprender cun fer ün giarsunedi. L’arrandschamaint preschainta dapü cu 60 misters e scolaziuns supplementeras. Tar bgers stands interactivs paun visitaduors e visitaduras pruver svessa tschertas lavuors tipicas da differents misters e survgnir uscheja ün’invista i’l minchadi da lavur. L’entredgia es gratuita. L’exposiziun da misters gniva organiseda fin uossa i’l ritem da trais ans da la Scoula industriela da Samedan. A partir da quist an vain ella organiseda cul nouv nom «Fiutscher Grischun dal Süd» da la Fundaziun pella promoziun da la furmaziun professiunela, insembel culs partenaris Societed da misteraunza grischuna e l’Uffizi per furmaziun professiunela Grischun. Ulteriuras infurmaziuns as chatta que sülla pagina «fiutscher-suedbuenden.ch».