Igl Museum da las mineras an nova splendur
L’Uniùn digls miniers digl Ragn Posteriur anvida ad egn vieadi tras igls tains tut spezial: Igl Museum da las mineras a Calantgil, restructuro digl tutafatg, vean reaviert la sonda digls 4 d’avregl. El dat investa an las galareias, an l’istorgia da las mineras ad an quella da parsunalitads istoricas.
Suainter egn tains da preparaziùn sapreschainta igl Museum da las mineras a Calantgil an nov vastgieu, realiso savund egn conzept d’exposiziùn inovativ. El fa reviver l’istorgia da maniera impressiunànta, ca quella davainta egn evenimaint pigls visitaders. Igl elemaint zentral e la tgarta geografica parpassabla: Visitadras a visitaders pon propi viandar tras la regiùn davains las Veiasmalas a localisar tut las mineras c’en inditgeadas da maniera prezisa.
La Galareia da la Cotglera
Egn’ulteriura culminaziùn e la Galareia da la Cotglera (Kohlplatz-Stollen) c’ign po trapassar. Sustanieus d’egna instalaziùn da video moderna sarendan igls visitaders a visitidaras agl mund stgir a misterius sut teara.
Mo las mineras muntavan blear daple ca me stantusa lavur an crapa a grepa. Igl e surtut las istorgias digls carstgàns involvieus sco par exaimpel quella digl Marchese Gaspare Ordogno de Rosales near quella digl Ivan Ragaz, istorgias c’ân do la taimpra a la regiùn. Ign amprenda d’ancanuscher las istorgias da lur veta – sasànd a mesa cugl inschignier Jean Jacques Markwalder par vurdar sur las spatlas, co el analisescha provas da minerals metalics.
Egn teater aposta per l’exposiziùn
L’avertura festiva da l’exposiziùn nova â laic la sonda digls 4 d’avregl a las 11.00 an tgea da scola a Calantgil. La vernissascha vean acumpagneada da la musica la Bandella dei Minatori. Egna culminaziùn particulara e igl teater c’e vagnieu scret aposta par quell’ocasiùn «La dalur da la lavur – Der Schmerz vom Erz – ragurdànzas da la sontga Barbara» da Rita Juon a Mario Nicca.
La sontga Barbara e patrùna digl miniers (giujieu da Nicole Gadola). Ella mancainta betga la reavertura digl museum a sameta sen veia anviers Calantgil an cumpagneia da la sia cumpogna Isabella (giujeada da Madleina Grischott). Viagiànd saragordan ellas digls evenimaints dramatics da l’istorgia da las mineras durànt quater tschantaners. Ulteriuras rolas vignan giujeadas dad Andreas Bott, Gerold Beck a Dumeni Mani.
Suainter c’igl e vagnieu canto da cuminànza la canzùn digls miniers tradiziunala, anvida l’Uniùn digls miniers Ragn Posteriur tut igls preschaints ad egn aperitiv an l’ustreia Alpenrose par far prengias sen la restructuraziùn digl museum.
Igl Museum da las mineras e aviert durànt la stagiùn 2026 davent digls 1. d’avregl antocen igls 31 d’october, mintga gi da las 08.30 antocen las 18.00. Ulteriuras infurmaziùns en da catar sen la pagina www.erzminen-hinterrhein.ch.
Gust da leger dapli?