Grond interess per las occurrenzas

Igl Parc Ela dattigl siva digl 2012 ed ainten chel sa cattan seis cumegns. Avant 14 onns, cura tg’el è nia fundo, davigl aint igl intschess digl Parc Ela anc 19 cumegns.

Digls seis cumegns dalla Regiun Alvra è angal igl cumegn da Vaz betg participo agl Parc Ela. Persiva è siva digl 2012 igl cumegn da Tavo/Tagn commember digl Parc Ela.

Igls seis cumegns tgi sa cattan damai aint igl perimeter digl Parc Ela furman igl elemaint central dall’uniun purtadra digl parc. Igls cumegns d’Albula/Alvra, Barvogn Filisour, Farrera, Lantsch, Surses e Tavo/Tagn dastgan conceder lour part, schi sa tracta pigl svilup, per l’activitad e per la funcziun digl parc. Igl Parc Ela ed igls seis cumegns collaboreschan ferm gist chegl tgi pertotga occurrenzas publicas, sanaziuns da meirs sitgs, projects digl traffic public e tar maseiras substitutivas da projects da biagier.

Ena sperdita tgi fò mal

Igl onn passo è sto en onn fitg animo pigl Parc Ela. La raschung è la mort anetga, antras en accident, da Cordo Simeon d’Alvagni. El è sto igl vicepresident digl Parc Ela. Siva dalla fundaziun digl Parc Ela è el sto ena persunga angascheda, plagn activitad ed ideias, en om fido ed er ena persunga cun en carisma particular. «Sies angaschamaint per la regiun, igl carstgang e la nateira ò furmo persistentamaintg igl Parc Ela», ò detg Patrizia Zanini, la presidenta dall’Uniun Parc Ela, alla radunanza da venderde a Filisour. Chell’ierta ins viglia purtar anavant aint igl senn digl barmeir.

Igl 2025 èn divers collaboratours digl Parc Ela s’orientos professiunalmaintg da nov. Uscheia ò la magnafatschenta Veronika Widmann banduno la direcziun digl Parc Ela. Cun Linda Netzer da Savognin è sto pussebel da cattar per la direcziun ena donna tgi canoscha bagn igl parc da nateira regiunal. Ella vign sustigneida dalla sia substituta Regina Lenz da Rodels e d’en team verso.

5885 persungas

Las numerousas occurrenzas digl Parc Ela (excursiuns, exposiziuns, purscheidas culinaras) on sviglia en grond interess igl davos onn. 5885 persungas on fatg diever dalla purscheida vasta digl Parc Ela. 1037 persungas èn er sa participadas allas 61 occurrenzas da furmaziun. Igl «Parc Ela Trek» ò genero passa 1500 pernottaziuns.

Igl Lai da Palpuogna on visito igl davos onn 10 771 persungas. Sto dalla parteida tar 23 occurrenzas è igl Parc Ela er cugl schinumno «Infomobil». Tranter igl schaner 2025 ed igl december 2025 è igl auto electric staziuno a Casti, e tg’è pussebel da piglier a fit, nia reservo per 1574 ouras.

Egn digls puncts culminonts digl davos onn da gestiun digl Parc Ela è stada igl settember l’avertura dalla Mazlareia Ela a Cunter.

En gudogn da stgers 75 000 francs

Tar antradas da 2,5 milliuns francs sera igl chint annual 2025 digl Par Ela cun en gudogn da stgers 75 000 francs. Davart dalla Confederaziun è neida ena contribuziun dad 1,175 milliuns francs e davart digl cantun Grischun èn chegl ena somma da 738 608 francs. 434 560 francs èn nias digls meds da projects impegnativs digl Parc Ela.

Davart digls seis cumegns digl Parc Ela èn neidas contribuziuns per ena somma da 151 000 francs e da 100 283 francs per la contribuziun annuala. La contribuziun annuala digls commembers e dallas commembras dall’Uniun Parc Ela, chella monta a 22 710 francs. Tar las expensas èn igls costs digl persunal dad 1,473 francs la cefra ota, suandada dalla somma da 729 355 francs per projects e la somma da 185 692 francs pigl menaschi digl parc.

Lothar Künzli e Daniel Ulber

An tavla tar la radunanza generala 2026 digl Parc Ela da venderde passo a Filisour èn er stadas las elecziuns dallas persungas tgi appartignan alla suprastanza digl Parc Ela. Reeligeida scu presidenta è neida Patrizia Zanini da Casti. Ella è siva digl otgover 2022 presidenta ed è avant stada tschintg onns commembra dalla suprastanza digl pi grond parc dalla nateira dalla Svizra. Reeligeidas an lour uffezi èn neidas Ursina Barblan da Barvogn, Sylvia Bärtschi da Tavo/Tagn e Martina Lanz da Beiva. Confirmo scu suprastant è er nia Peder Plaz da Savognin, sesent a Wettingen. Da nov per la suprastanza digl Parc Ela èn nias eligias Lothar Künzli da Savognin, igl magnafatschenta dalla Scola da skis Savognin ed igl pour e substitut deputo Daniel Ulber da Lantsch.