Dumonda da fabrica per «ScuolSolar» es inoltrada

Scha tuot va bain e scha las autoritats chantunalas dan glüm verda, schi dess l’implant fotovoltaic «ScuolSolar» prodüer sia prüma forza dal 2028, quai comunichescha la società portadra «ScuolSolar». Tenor la comunicaziun han ils respunsabels inoltrà la dumonda da fabrica per l’implant fotovoltaic planisà illa regiun da skis Motta Naluns sur Scuol. Quai davo cha’l proget saja gnü surlavurà e redimensiunà in möd cumplessiv.

Adattamaints dal proget

Cha dat andit a las adattaziuns cumplessivas hajan ouravant tuot differenzas tanter ils respunsabels dal proget ed ils respunsabels dal Chantun. Cha cul proget oriund nu s’haja pudü chattar avuonda masüras da cumpensaziun adattadas per accumplir las prescripziuns d’ambiaint necessarias. Quai culla consequenza chi s’ha amo üna jada stuvü reponderar il proget e redüer la surfatscha da l’implant e cun quai eir la producziun da forza. Tenor ils respunsabels dess üna prüma part da l’implant gnir tutta in funcziun il 2028. Cur cha’l proget es lura finalisà, dess l’implant prodüer forza regenerabla da 13,5 gigawatts ura per on, quai chi correspuonda a forza per 3000 chasadas.

Prossems pass

Uossa spetta la società portadra, dimena il cumün da Scuol, l’interpraisa Energia Engiadina e las Ouvras electricas d’Engiadina, cha’l Chantun e tuot ils ulteriurs partits invouts in quist proget dettan glüm verda. Schi vain lura decis a favur dal proget, schi seguan dumondas da contribuziun da promoziun ed ün’analisa da rendabilità.