Las giaglinas giaudan puspè la libertad

Per bunamain tschintg mais èn las giaglinas stadas tschentadas ina sin l’autra. Pervia da las mesiras cunter la grippa d’utschels n’han las 100 giaglinas dal bain a Panaduz betg pudì bandunar lur stalla. Malgrà in curtin d’enviern èsi stà plitost stretg, la roda libra ha mancà, e quai ha chaschunà nauscha luna a las giaglinas. «Il terz mais han ellas cumenzà cun cannibalissem ed han cumenzà a piclar ina l’autra», ha ditg Peter Brasser, il pur dal bain a Panaduz, envers RTR. Per occupar las giaglinas ha el pendì si in crap da sal mineral ed in satg cun strom, vi dal qual las giaglinas pudevan piclar. Ed ina giada ha il pur stuì serrar en las giaglinas en stalla e las ha laschà per trais dis en il stgir. Che suenter saja la situaziun cun il cannibalissem sa meglierada, ha el cuntinuà.

Nairas uras dad ir ora

Quellas dispitas han uss ina fin. L’emprim d’avrigl ha Peter Brasser finalmain puspè pudì avrir la porta da la stalla e laschar las giaglinas ora en il liber. Cura ch’il pur ha avrì la porta parevan las giaglinas dad esser in pau surdumandadas cun la situaziun, ma i n’è betg ì ditg enfin ch’ellas han cumenzà a currer ed a sventular. In mument spezial per il pur: «Jau di adina – sch’i va bain cun ils animals, lura vai bain cun il pur. E sch’i va bain cun il pur, lura vai bain cun ils animals. E quai è ussa bel da guardar ch’els dastgan puspè ir ora.»