Uras

Tuccar tuccan ei, ils zenns d’Andiast – mintga damaun dallas tschun! Gie, l’ura-baselgia dad Andiast cloma la glieud zun baul all’oraziun ni alla lavur. Mo jeu creiel che ozildi suondien aunc buca bia carstgauns siu clom – dano jeu … Savens level jeu dallas tschun, denton buca pervia dils zenns da baselgia, na, muort mia ura interiura.

Jeu hai pliras autras uras, clar, mo la pli impurtonta ei quella en memezza. Ella damogna miu ritmus da veta. «Leva», di ella net e stget la damaun marvegl, e «va a letg», camonda ella dallas nov (tgei ch’ei buca propi pratic, sche miu um ed jeu lessen ir a concert giu Vuorz ni sch’jeu hai in exercezi dil chor mischedau ad Andiast …).

Gie, jeu hai problems cun mias uras: L’ura da bratschelet per exempel dependa dall’energia da sulegl, vul dir, igl unviern, sch’jeu emblidel da metter ella da temps en temps sil parsiel-finiastra, stat ella eri baul ni tard, schizun si Andiast nua ch’ei dat aschi bia sulegl – sco sch’ella lessi admonir mei dad ir giuadora mintgadi e far ina spassegiada.

Ni sai jeu fidar all’ura da meisetta ch’jeu hai artau da miu bab: Jeu seregordel sco el (che luvrava siat dis l’jamna) seseva la sera, avon che ir a letg, alla meisetta en siu biro e legeva Fontane ella glisch dad ina cazzola pintga, e sper el quella ura sularada. Ella ei ina dètga bellezia, mo ella s’avonza adina pli spert, schegie che l’urer ha empruau da reparar ella. Forsa ch’ella less varnegiar mei ch’jeu stoppi guder mintga mument, perquei ch’il temps varghi adina pli spert?

Lu, nossa veglia ura da preit ella stiva da Jona: Da temps en temps refusa ella da funcziunar, perquei ch’jeu hai emblidau da trer si ella. Miu sbagl, clar, mo aschia sai jeu era emprender enzatgei dad ella: Fuss ei buca sanadeivel per mei dad esser enqualga lischenta sco ella …?

Ella pendeva antruras vid la preit el biro da miu tat ch’era plevon e habitava a Turitg en ina casa pervenda nobla, nua ch’jeu passentavel mintgaton mias vacanzas. E mintga sera, avon da durmir, sun jeu ida en siu biro, nua ch’el haveva in truchet plein da tschugalata ed jeu hai survegniu in toc (ch’jeu hai magliau cun grond plascher – suenter schubergiar ils dents …).

Resta ina suletta ura che funcziunescha adina – senz’urer, senza trer si ni senza sulegl: l’ura interiura. Mo era ella vegn a star eri in di ed jeu sai buca cura – per cletg!

Johanna Krapf è lectora ed autura e viva e lavura a Rapperswil ed ­Andiast. Ella ha emprais sursilvan e sa fatschenta intensivamain cun quella lingua.