Egna exposiziùn da rastànzas

Igls sculars da duas classas da la scola a Spleia ân survagnieu visita da curt da Lukas Bardill, egn surmester da la Scola òlta da pedagogia digl cantùn Grischùn, ca s’angascha par promover igl interess da l’arceologeia tier igls giuvens. El â acumpagnieu igls unfànts tras que project actual, anzemel cun igls surmesters Joëlle Schoenahl, Giuliana Bardill a Reto Attenhofer, egn anteriur surmester da Spleia. La mira digl project d’exposiziùn e da cumbinar igl passo ad igl preschaint: da mussar objects istorics da la regiùn a da l’otra vart reinterpretar artisticameing objects digl mintgagi digls unfànts.

Bleara fantaseia

L’antiera eanda ân igls sculars a las scularas preparo a Spleia igl clavo Michelsen par l’exposiziùn. Vendargis suaintermiezgi, igls 27 da mars â tut gieu dad easser prùnt. Las visitadras ad igls visitaders en rivos sen las 16.00 par vaser quellas ovras viglias a novas. Gia digl esch aint, vei digl zuler, ân ign via l’amprema ovra: egn ufo cun aint egn extraterrester.

Sei da la stgeala a veda las pares en stadas exponidas las otras lavurs digls unfànts, inclusiv tavlas cun infurmaziùns da noua ca la rastànza vean, tge valeta c’ella veva a sco c’igl scular ne la sculara e vagnida tier quel.

Marina Knöpfel e egna sculara da Novagnas. Ella â prieu da tgea egn vigl controller d’egn gioj da computer ad â scho crescher flurs or da quel. Ella â declaro: «Parquegl c’igl tains â manco, ve jou sadezidieu da prender flurs da plastic.» Ascheia â igl toc electric flurieu a Spleia la fegn da mars, ear sch’igl sbischava oravànt.

Egna otra buaba â biagieu egn casti or da buteglias da PET. Aint agl casti vez’ign arestos ca rivan betga or. La fantaseia digls unfànts e grànda, igls carschieus ân ampruvo da realisar tut igls giavischs digls sculars – mo mintgatànt mancava semplameing igl tains.

Rastànza viglia

Igl museum a Spleia e biagieu sei an duas parts: Sen egn màn en las ovras c’igls unfànts ân zambargieu, malagieu near construieu or da lur objects digl mintgagi. A sen l’otra vart en igls objects pli vigls. Quegl en tgossas, c’igls sculars ân prieu da tgea, da paraints near cunaschaints. Pablo Baschung da Novagnas â par exaimpel purto schlissarigns c’en rivos an la Val Ragn cun igls Brits agls ons anturn 1920. Oters ân cato baclenis vigls da far fagn, fiers da stirar a parfegn egn furmaritsch (Lockenstab).

Tras que project ân igls unfànts amprieu blear sur da l’istorgia, dad organisar anzemel egn’exposiziùn a blear ear sur da las diferaintas furmas d’art. Agls unfànts â’gl plaschieu da saver dezeder sezs tge c’els vutan far a co realisar lur ideias.