Tge far cun tants ovs cotgs?

Pasca è cumbinà cun ventira, plaschair e resvegl. Tut che sa legra dal verd che prui e dal temp primavaun. Dapertut han famiglias giudì il firà da glindesdi Pasca cun ir a ruclar u rodlar ovs. Questa veglia tradiziun fan ins dapertut en il Grischun, davent da l’Engiadina bassa, il Grischun central enfin ils vitgs da la Surselva. Igl è l’isanza ch’ils uffants van ensemen sin il plaz tradiziunal per giugar e star da cumpagnia. En vischinanza è per il solit ina pastira libra cun in zic pendenza. Là datti concurrenzas da ruclar u rodlar quels. Quels che èn ruts èn disqualifitgads.

Uschia poi dar blers ovs cotgs quest di. L’entir proviant ch’ins pren al ruclar u rodlar ovs na pon ins betg mangiar al lieu. Er betg cun bler aromat e maionesa. Tut las chasarinas ed ils cuschinunzs da hobi san ch’ins sto consumar ovs cotgs aifer paucs dis. Dentant sulettamain ovs ch’èn frestgs dattan ina buna tratga. Damai: tge far cun tants ovs cotgs ch’ins porta puspè a chasa? Simplamain mangiar els – ch’els sajan davent – n’è betg il miglier cussegl. Qua in tip per ina tratga tipica suenter Pasca.

Cun otg ovs cotgs pon ins far in gratin d’ovs. L’emprim fan ins la sosa tenor gust, per exempel ina da tomatas, ina da buglion u ina da brassà. Trais quarts da la sosa derscher en ina furma da gratinar ch’ins ha unschì ora cun ieli u pischada. Alura metter en ils ovs ch’ins ha taglià en quarts, mezs u talgias. Derscher surora il rest da la sosa e springir chaschiel surora (Sbrinz u Parmigiano). Avant che metter la cuppa en il furnel anc «decorar» cun intgins tocs pischada. Ensemen cun ina salata stagiunala verda dat quai in’exquisita tschaina u gentar.