Ussa ha era Medel sia «WG» – quella dall’Anna

Sch’ils da Medel fan teater, vegn la glieud en roschas. Quei era pli baul il cass cullas uniuns dramaticas a Platta e Curaglia sepresentavan alla tribuna, mo era ussa. Dapi in tschuppel onns domineschan las cumedias sin tribuna en Val Medel. «Che la glieud vegn aschi bugen tier nus a mirar nossas producziuns po haver differents motivs. In ei segir il dialect medelin», di la reschissura Evelina Giger dalla Gruppa da teater Medel/Lucmagn. Mo buca mo quei. «Nus fagein bugen teater ed jeu crei ch’ins senti era quei plascher. L’atmosfera enteifer la gruppa ei fetg buna», aschunta il president dalla gruppa Patric Gienal.

Guder la cumpignia

Per las acturas ed ils acturs sezs gioga surtut ina cumponenta ina rolla principala per semetter repetidamein els stadals d’emprender texts ordadora. «Per mei ei quei la cumpignia, haver legher ensemen e semplamein giugar», di Victor Venzin ch’ei dapi biars onns in dils giugadurs da tschep dalla gruppa. E per las aspectaturas ed ils aspectaturs? «Quels vulan sedivertir, haver legher. Sin quest mund dat ei aunc avunda ch’ei trest. Lu drova ei buca quei aunc sin tribuna», manegian ton Eveline Giger sco era Patric Gienal. Dapi il schaner s’entaupan las acturas ed ils acturs a lur exercezis regulars ella sala dalla casa da scola a Curaglia.

In tema actual

La cumedia da quest onn che la Gruppa da teater Medel/Lucmagn ei vid preparar senumna «Tut ok ella WG dall’Anna». Igl ei in toc en treis acts da Brigitte Wiese e Patrick Siebler. La versiun romontscha ha la reschissura Evelina Giger gest procurau sezza. La premiera ei ils 10 d’avrel 2026 ella sala dalla casa da scola a Curaglia. «Cuminonzas da habitar ein actualas. Alla tscherca d’in toc adattau per nossa gruppa sun jeu fruntada sin quel. La fin finala sto il diember d’acturas ed acturs e lur qualitads corrispunder al toc e sche l’actualitad constat, lu ton meglier», di Evelina Giger che meina reschia per l’otgavla ga a Curaglia.

Generaziuns sut in tetg

Il cuntegn dil toc: L’Anna De Castelberg posseda ina villa e habitescha persula leu. Quella villa sveglia denton era igl interess dalla vischnaunca, respectivamein da siu president Roman Blumenthal. La finamira d’animar l’Anna d’ir en casa da vegls reussescha buc. Persuenter vegn el da motivar la dunna sils onns da recepir tier ella autra glieud, per part senza dimora. Il luvrer social dalla vischnaunca Lars Tschatscher vegn lu cun dus cass specials en casa. Mo els ein buc ils sulets che prendan dimora ella villa. Aschia nescha l’emprema cuminonza da habitar da generaziuns dalla Val Medel. Quell’idea venda il president communal secapescha per si’ovra ed envida la schurnalista da La Quotidiana da rapportar. Intrigas, in che gauda las spirituosas en stiva, ina che penda vid il telefonin ed in ch’appreziescha la vischinonza dalla dunna d’in auter ch’ei ussa en casa, semischeidan. Quella mischeida savess buc esser pli divertenta.