La disgrazia vers ina nova era

Igl èn tuns sco or d’in auter mund. E tuttina tuna tut uschè manaivel. Avant 40 onns, ils 26 d’avrigl 1986, è explodì il reactur atomar da Tschernobyl en l’Uniun sovietica (oz Ucraina). Las emnas suenter la catastrofa vegniva perfin discutà en Svizra tge ch’ins possia mangiar e tge betg. La radioactivitad era vegnida suflada dal nord da l’Ucraina fin en l’Europa dal Vest.

Quest mais èsi pia 40 onns dapi quella avaria. Enfin oz vala la disgrazia sco il pli grev accident en in’ovra atomara. Millis da morts hai dà causa la disgrazia e silsuenter pervi da la radiaziun. In’entira citad – Prypjat – che deva dimora als lavurers da l’ovra è vegnida bandunada. Anc oz n’è l’ovra da Tschernobyl atgnamain betg segira e segirada, malgrà in gigantic sarcofag sur l’indriz (foto).

Il podcast «Geschichte» dad SRF raquinta en trais parts l’istorgia da la disgrazia atomara da Tschernobyl. L’emprima episoda lascha udir blers tuns dal temp, declerond ils contexts da quella giada, da la cretta vi da l’energia atomara fin a la critica cunter la tecnologia. Il super-gau da Tschernobyl ha lura – sco che la redactura dad SRF di – «catapultà l’umanitad en ina nova era».

Surtut ha l’explosiun però catapultà bleras famiglias or da Prypjat, sco p.ex. la famiglia da la giuvna Maryna Peter. Ella stat en il center da la segunda episoda da la seria dal podcast «Geschichte». Il bab da Maryna Peter lavurava en l’ovra atomara ed ha pudì alarmar a temp sia famiglia. Oz viva Maryna Peter en Svizra. Cun in redactur dad SRF ha ella visità sia veglia patria.

Da las trais episodas dal podcast «Geschichte» davart Tschernobyl èn accessiblas entant pir duas. Parallel cun quellas duas emissiuns datti er anc ina story online davart il return da Maryna Peter. Da chattar è tut sin srf.ch.