Era la Skateline Alvra duai attrair

«Cun la patinera natirala Skateline Alvra vulain nus sviluppar vinavant la destinaziun da vacanzas», di Niculin Josty, il mainagestiun da Bravuogn Filisur Turissem, ad RTR. Cun ils responsabels da la Skateline Alvra da Surava ch’è en il fratemp serrada sajan ins en contact, cuntinuescha el, «ins guarda actualmain, sch’ina part da l’infrastructura pudess vegnir surpigliada, per exempel ils patins per dar a fit, la maschina da glatsch ed auter pli.» Sco ch’el menziuna saja in dals avantatgs da la Skateline Alvra, ch’ins na dovria betg in manaschi da bus sco tar l’anteriura Skateline a Surava: «A Bravuogn sa tracta numnadamain dad ina patinera circulara – vul dir la partenza e l’arrivada èn al medem lieu», declera Niculin Josty.

En matg duai vegnir fundada in’uniun

Per la gestiun e per l’organisaziun duai vegnir fundada ils 22 da matg in’uniun. L’interess per la Skateline Alvra a Bravuogn saja gia grond, ad in’occurrenza quest enviern saja stada preschenta ina sessantina da persunas e diversas hajan gia mussà interess da gidar activamain en l’uniun. Concernent la finanziaziun na datti tenor Niculin Josty anc naginas cifras concretas – ina part dals daners per la gestiun pudessan vegnir or d’in fond da l’organisaziun turistica. Pertutgant ils aspects da l’ambient e las lubientschas sajan ins conscient da l’impurtanza. Il mainagestiun da Bravuogn Filisur Turissem di ch’igl haja gia dà contacts cun l’Uffizi da chatscha e pestga dal Grischun per garantir che tut las prescripziuns vegnian resguardadas.