«Plascher dalla musica e dil sault»

«Sche nus savein buca frenar il svilup actual, vegn l’Uniun da costums Mustér en paucs onns ad esser historia.» Quei ha il president dall’Uniun da costums Mustér scret ell’ediziun dil zercladur 2022 dil Detg Denter Nus, il magazin ufficial dalla vischnaunca da Mustér. Dapi lu ei la situaziun buca semidada da rudien en favur dall’uniun.

Per garantir si’existenza era igl avegnir ha ella instradau dacuort ina campagna en medias socialas e cun in flyer. «La finamira da quella campagna ei d’animar dunnas ed umens cun plascher dalla musica e dil sault da s’annunziar», di Ervin Maissen che presidiescha l’uniun dapi pressapauc 15 onns. Bunamein tuttas e tuts siat commembers dall’uniun han il mument ina funcziun da responsabladad. Mo aschia san las obligaziuns vegnir ademplidas, seigi quei davart il tgamun e las finanzas ni era direger ils exercezis.

Aunc siat activas ed activs

L’Uniun da costums Mustér dumbra il mument aunc siat commembras e commembers activs. La media da vegliadetgna da quellas e quels ei denter 65 e 70 onns. «Grazia ad ina commembra nova ei quella media sesbassada levamein», di Ervin Maissen. Commembras e commembers giuvens havess l’uniun pli che da basegns. La campagna en medias socialas cun in flyer repartius dacuort en tuttas vischnauncas da Breil ensi ha buca purtau grond fretg. «Nus havein giu biaras reacziuns sin nies appel. Sedecidius concretamein d’entrar ell’uniun ei denton negin», constatescha il president. Las premissas per saver separticipar allas activitads dall’uniun ein da principi semplas. «Ei drova plascher dalla musica e dil sault. Sch’enzatgi sa buca saltar, ei quei era buc in grond problem. Emprender sa mintgina e mintgin, ei drova sulettamein in techet bunaveglia», di Ervin Maissen.

Differentas activitads

L’Uniun da costums Mustér s’entaupa duront igl unviern ina ga ad jamna ad in exercezi. Quellas e quels che vulan san separticipar a cuors regiunals ni cantunals. «Sche zaco pusseivel separticipein nus era mintg’onn alla radunonza da delegai dall’Uniun da costums svizra. Uonn ei quella a Sursee», declara Ervin Maissen. Per ordinari seigi quella radunonza cumbinada cun in interessant program da rama. L’uniun sepresenta ad ina ni l’autra occasiun ella regiun. Sco ils onns passai ei era puspei previu uonn in arranschament da sault ella casa da tgira Puntreis ensemen culla Gruppa da sault e costums Glion e contuorn. Ulteriuramein ei l’uniun era engaschada allas processiuns a Mustér. «Sco en autras uniuns a Mustér era ein las commembras ed ils commembers dall’uniun da costums engaschai er en autras uniuns ed instituziuns. Sch’ins vul dir aschia, ei quei in engaschament general en favur dalla cultura», di Ervin Maissen. Saltar ei dil reminent buca mo in survetsch alla cundiziun corporala, mobein era d’avantatg per la vitalitad spirtala.

Contact culs Movis

«Per saver saltar en in bi rudi da figuras stuessen nus esser silmeins diesch commembras e commembers, vul dir tschun pèrs. Silmeins treis novizas ni novizs fussen pia necessaris», di Ervin Maissen. Reussescha ei buca d’augmentar il diember da commembras e commembers e tec a tec era da regiuvinar l’uniun, ei siu avegnir incerts. Igl engaschament cun gruppas d’affons pli baul ha buca purtau il success persistent giavischau. En quella direcziun savess ina eventuala collaboraziun culs Movis – la gruppa da sault dalla Cadi – denton ir il proxim temps. Sco Ervin Maissen di, ei l’uniun vid tschercar pusseivladads cun lezs. «Sche negin ei promt da s’engaschar, va ei cun nossa uniun sco cun autras era. Lu dat ei semplamein buca pli ella enzacu», di Ervin Maissen.