Il Péz Regina arva puspei

Il messadi silla nova pagina d’internet dil hotel e restaurant Péz Regina sveglia fei e speronza tier ils anteriurs hosps ch’ein stai disillusiunai digl anteriur ustier. El haveva fiers il menaschi dil tempel en avon varg’in onn. Dapi igl 1. da mars 2025 ei il Péz Regina serraus. (mira box). Mo ussa legian ins: «Cun novs affittaders, ina carta da tratgas concepida da niev e cun claras uras d’avertura duein l’ustria ed igl albiert dil Péz Regina puspei daventar quei ch’el ei gia adina staus.» Ed aunc dapli: «Nus vulein scaffir in liug da scuntrada viv pil vitg, per hosps dalla regiun e per visitadras e visitaders da lunsch e da maneivel.»

Dil Radio Piz al Péz Regina

Stephan M. Porchet senumna il niev ustier e hotelier dil Péz Regina. Ses emprems mistregns ein stai cussegliader da relaziuns publicas e schurnalist da radio. Suenter sia scolaziun sco cussegliader da relaziuns publicas eis el staus en giuvens onns in dils moderaturs d’entschatta dil Radio Piz Corvatsch. Stephan M. Porchet ha oz 57 onns. El ei naschius e carschius si ils emprems onns en l’Engiadina Bassa. La gronda part da sia veta ha el denton passentau ella Bassa.

La via ella gastronomia

Igl onn 1998 ei Stefan M. Porchet daventaus interprendider independent. El ha surpriu numerus mandats da cussegliaziun ed ha luvrau denteren sco moderatur da radio. Denter auter ha el era menau ina interpresa che venda poulets dil gril. Dasperas ha el cussegliau interpresas ed ha gestiunau in menaschi da hotel e restaurant a Gottlieben sper il Rein agl ur dil Lag Bodan. Quei seigi stau siu emprem contact direct cun in menaschi da gastronomia: «Sur pliras staziuns sun jeu alla fin finala setschentaus en Val Lumnezia. Atgnamein erel jeu vegnius per mirar inagada e sun s’inamuraus immediat en quella bellezia cuntrada.»

Normalitad e nuot auter

Stephan M. Porchet ei cunscients dil fatg ch’il Péz Regina a Lumbrein ei ina dallas paucas ustrias ch’ei dat els vitgs lumnezians. «Ei drova uras d’avertura ch’ein definidas e che vegnan suandadas. Nus vulein esser in hotel cun circa 20 letgs ed in restaurant cun ina carta da tratgas che plidenta in publicum vast», di il niev affittader. «Nus vulein esser autentics e part da Lumbrein e dalla Lumnezia. Ed aschia vegnin jeu e mia dunna a gestiunar ensemen cun quater collaboraturas il Péz Regina.»

Plidentar ils indigens

«Sco restaurant vulein nus era plidentar las indigenas ed ils  indigens da Lumbrein, dalla Lumnezia e dalla Surselva», di Stephan M. Porchet. «Jeu saiel ch’ei vegn ad esser sco tier tut ils auters ustiers novs ina tura sil fil d’ina muntogna da perschuader tonta clientella sco pusseivel da nossa purschida.» Stephan M. Porchet di che dapi la pausa dil coronavirus seigi ei insumma vegniu pli grev per la gastronomia. Era ils prezis seigien adina puspei in tema cura ch’ina ustria arvi. «Igl ei denton impurtont da restar autentics enviers indigens e jasters.»

La mischeida munta

Stephan M. Porchet raquenta da sias numerusas plazzas da lavur cun bialas e meins bialas entupadas. El di ch’el hagi gest ella gastronomia empriu bia cun tedlar era las vuschs criticas. Malgrad quei seigi ei reussiu da viver sia perschuasiun sco interprendider. «Per mei eis ei adina ina mischeida da tuttas cumponentas en in menaschi che dattan il resultat. Quei entscheiva cun l’atmosfera dil local e cala cul persunal e la qualitad dils menus e dallas bubrondas.»

Reavertura da calonda matg

«Tier nus dat ei neginas grondas festivitads d’avertura», di igl ustier futur. «Naven digl 1. da matg 2026 ei il Péz Regina puspei aviarts e nus salidein cordialmein tut quellas e quels che vegnan.» Il gastronom e cussegliader d’interpresas prognostichescha ch’ei vegni a duvrar in cuort temps entochen che tut funcziuneschi senza macla. «Nus vegnin a porscher ina carta cun tratgas alla moda da casa, dasperas vegnin nus denton era a risguardar influenzas e trends actuals. Jeu vegnel a cumprar products frestgs dalla regiun en collaboraziun culla mazlaria da Vrin, la cascharia da Lumbrein e cun il pasterner da Glion. Jeu hai era l’intenziun da risguardar il label dil capricorn grischuncul caffé e las bubrondas.»