La BVZ Holding augmenta la dividenda

Il 2025 ei staus in onn da grond success per la Brig Visp Zermatt Holding SA (BVZ). La sviulta ei carschida per 6,6 % sin 230,3 milliuns francs ed il gudogn per 52,1 % sin 34,9 milliuns francs. Quellas cefras da record lubeschan all’interpresa d’augmentar la dividenda. Pigl onn da fatschenta 2025 conderscha ella 30 francs per aczia enstagl da 18 francs sco igl onn precedent.

Signals positivs

Igl augment dalla dividenda sco era tuttas autras propostas dil cussegl d’administraziun ein vegnidas acceptadas alla radunonza generala la mesjamna ad Andermatt. Sco quei che l’interpresa scriva en ina communicaziun als mieds da massa ei quei augment dalla dividenda pusseivels grazia als records dalla Viafier Gornergrat, ils recavs dallas immobilias ed il bien andament da fatschenta dil Glacier Express. Mo lu era las entradas vid participaziuns ed ils signals positivs dil svilup futur dalla gruppa che cumpeglia era la Viafier Matterhorn Gottard.

Previu grondas investiziuns   

La BVZ Holding cuntinuescha cun sia strategia d’investiziuns. Ina part da quellas ein quater novs trens dil tip Polaris per la Viafier Gornergrat per 30 milliuns francs. Els vegnan en funcziun igl unviern 2028. Entochen igl onn 2032 investescha la BVZ Holding 200 milliuns francs ella viafier ed il material rullont, sco era en ulteriurs projects d’infrastructura. «Schegie che las rescas geopoliticas sco per exempel el Proxim Orient ein sfidas, sesenta la BVZ Holding d’esser semtgada pigl avegnir. El focus ei il carschament qualitativ che salva la singularadad dalla cuntrada natirala, mo che porscha era aventuras d’aulta qualitad als hosps», scriva l’interpresa.