Zuoz disch finelmaing SCHI a Sanadura
La radunanza cumünela da Zuoz ho dit cleramaing da SCHI a la Sanadura, la nouva organisaziun per il provedimaint da sandet in Engiadin’Ota. Que cun 87 cunter 28 vuschs e que adonta cha’l cussagl cumünel vaiva spusto la decisiun ed arcumando düraunt las ultimas eivnas explicitamaing da niauncha entrer i’l affer. Tuottüna, cul schi retardo da Zuoz haun uossa tuot las ündesch vschinaunchas in Engiadin’Ota decis in chosa e per la chosa.
Sanadura SCHI u NA? Quella dumanda ho ils ultims mais procuro per bgeras discussiuns in Engiadin’Ota, impustüt illa vschinauncha da Zuoz. Zieva cha desch dad ündesch vschinaunchas vaivan già decis in chosa Sanadura – e quai per part cun granda magiurited per – es uossa, scu ultima vschinauncha, sto Zuoz landervi.
In sia radunanza dals 8 avrigl 2026, e cun 87 cunter 28 vuschs, ho finelmaing eir la populaziun da Zuoz dit cleramaing da SCHI a la nouva organisaziun pel provedimaint da sandet in Engiadin’Ota. E que melgrô l’arcumandaziun dal cussagl cumünel da niauncha entrer i’l affer, e zieva cha’l cussagl ho explicitamaing e düraunt püssas eivnas fat frunt ad üna partecipaziun tenor cussagl cumünel «impondereda» a la Sanadura.
SCHI a Sanadura – NA al cussagl cumünel
Üna da quellas persunas chi ho cumbattieu per spuster quista decisiun impondereda, es sto il president cumünel da Zuoz, Romeo Cusini. Invaunamaing ho el cun tuot las forzas pussiblas – eir auncha düraunt la radunanza – pruvo da persvader a sia populaziun. «Eau accept quista decisiun democratica. La populaziun ho vuscho, però eir saviand inua chi sun las difficulteds per nossa vschinauncha in avegnir», valütescha Romeo Cusini il resultat güsta cuort zieva la radunanza.
Sieus argumaints e quels dal cussagl cumünel nun haun persvas. Nempe cha la vschinauncha da Zuoz hegia auncha memma bgeras dumandas aviertas in connex cun las duas instituziuns, SGO – la fundaziun in procedura da concuors – e Sanadura. E ch’impü maunchan ouravaunt tuot las infurmaziuns necessarias davart il tema consequenzas finanzielas per la vschinauncha per alura piglier üna decisiun fundeda in chosa.
Suot il strich però sun stos var trais quarts da la populaziun dad ün oter avis. E que sainza chi ho do grandas discussiuns düraunt la radunanza. Dimena as pudess fer la dumanda, schi ho insomma valieu la paina per tuot quist sforz. La decisiun paraiva nempe già dad esser tratta ouravaunt. «A vela adüna la paina da cumbatter per la chosa. Nus vains fat quista lavur our da persvasiun e perque nu sun eau neir brichafat dischillus da la decisiun. Forsa ch’eir la lojalited invers otras vschinaunchas ho cò giuvo üna tscherta rolla», suppuona il president cumünel pünavaunt.
Üna decisiun chi fo plaschair
Fin l’ultim varon püs factuors mno a la decisiun. Po esser cha la glieud saro steda simplamaing stüffa da la discussiun, ubain cha tschertüns varon gieu respet invers l’intschertezza in connex culla sgürezza dal provedimaint da sandet ed alura varo sgüra eir la solidarited u lojalited invers la cumünaunza giuvo üna rolla.
Valüter la decisiun nu vuless auncha Andrea Fanconi, il president ad interim dal cussagl administrativ da la Sanadura. Ün di zieva la radunanza piglia el seguaintamaing pusiziun invers la FMR: «Eau nu vuless interpreter memma. Però nus pigliains la decisiun cun grand plaschair per cugnuschentscha. Eau sun da l’avis cha que saja üna respunsabilited cumünaivla da tuot la regiun da sandet. Perque sun eau fich cuntaint cha Zuoz fo uossa eir part da la Sanadura.»
«Nus vains pruvo da musser ils prievels finanziels e quels vzaronsa alura a la prosma radunanza da büdschet in november.»
Romeo Cusini, president cumünel da Zuoz
Segns da dumanda eir in avegnir
Que chi vuless dir cha a partir da dalum paun decider tuot las vschinaunchas insembel cu cha que vo inavaunt cul provedimaint da sandet illa regiun. Ed apropo decisiuns in avegnir, cò accentuescha il president cumünel da Zuoz cha la tscherna per ün commember pel cussagl da sandet saja già instradeda. Chi’s tratta cò da duas candidatas u candidats pussibels dadour il ravuogl dal cussagl cumünel e dadour il ravuogl politic.
Chi cha que saja nu vuless Romeo Cusini in quist mumaint auncha tradir e conclüda il discuors fand attent aunch’üna vouta a las sfidas finanzielas pella vschinauncha in avegnir. «Progets per svilupper la vschinauncha da Zuoz, quels pudarons planet metter da la vart. Quist pass ho consequenzas finanzielas. Nus vains pruvo da musser ils prievels finanziels e quels vzaronsa alura a la prosma radunanza da büdschet in november. Que do nempe auncha oters plazzels da fabrica illa regiun chi haun eir lur predsch.» E perque spera e spetta Romeo Cusini pünavaunt cha la populaziun stetta alura eir in avegnir davous la decisiun chi’d es gnida tratta düraunt quista radunanza.
A tuotta via es la tematica da fer part a la Sanadura u brich, uossa definitivmaing e finelmaing giò d’maisa. Que chi resta però sun auncha bgeras dumandas aviertas in connex culla SGO e che chi capita alura per exaimpel cullas immobiglias da l’ospidel e las chesas da persunel a Samedan.
Gust da leger dapli?