A do ün cumbat electorel

Per il presidi cumünel da San Murezzan do que ün cumbat electorel: Sper Adriano Iseppi voul eir Sebastian Bahner dvanter nouv president cumünel. Que rapporta la Posta Ladina. Cha Sebastian Bahner hegia 46 ans e viva cun sia famiglia a San Murezzan. In sia carriera professiunela ho el tenor comunicaziun già gieu diversas incumbenzas da mner cumplexas cun focus strategic, organisatoric e finanziel. Sias experienzas voul el tenor egnas indicaziuns druver uossa a favur da la vschinauncha per svilupper quella inavaunt scu lö da viver e lavurer e per l’economia. La decisiun da candider ho el piglio «zieva lungias ponderaziuns e divers discuors cun exponents da la politica, economia e da l’administraziun». Cha que saja sto important per el da’s fer ün purtret cumplessiv da las sfidas aunz cu as decider da candider.

Il president actuel Christian Jott Jenny nu candidescha per üna terza perioda d’uffizi. El es daspö l’an 2019 al timun da la vschinauncha. Candidaturas paun auncha gnir inoltredas fin mardi, ils 14 avrigl. L’elecziun dal presidi cumünel da San Murezzan es alura als 14 gün 2026. (rtr/fmr)