Il commerci da Glion ha fatg Primavera

Duront l’exposiziun Primavera che ha cuzzau naven dallas 10.00 entochen las 17.00 ei la Via dil Glogn vegnida serrada pil traffic motorisau ed aschia aviarta per las exposituras ed ils expositurs dallas fracziuns da Glion e la clientella. Sin quei tschancun ed era en auters loghens avon las fatschentas han las visitadras ed ils visitaders saviu flanar e far cumissiuns ellas stizuns ed admirar differentas attracziuns per famiglias ed affons. Per la commercianta Esther Putzi-Caduff dalla papetaria Maggi a Glion ei l’exposiziun ina caschun unica per saver mussar la purschida alla clientella. «Quellas e quels che vegnan visetan forsa ina stizun ni l’autra ch’els visitassen schiglioc buc. E lu vesan ellas ed els forsa tgei ch’ins sa tut cumprar a Glion enstagl d’ir enzanua auter.»

Moda, polizia e pumpiers

In element central da l’exposiziun ei il program accumpignont staus: Denter auter cun ina parada da moda, ina tavolata, presentaziuns d’ideas per nozzas, musica live sco era presentaziuns dils pumpiers da Glion e dalla Polizia cantunala. Els tuts han dau envestas en lur lavur. La finamira dalla tschunavla exposiziun Primavera a Glion era da visualisar la diversitad economica e sociala da la regiun e da promover il brat persunal denter la clientella ed ils menaschis.