Dermont niev suprastont communal da Laax

La radunonza communala da Laax ha eligiu la davosa sonda Matiu Dermont sco niev commember dalla suprastonza communala. Dermont ha obteniu 100 dallas 140 vuschs pusseivlas ed ha cunquei gudignau la lutga electorala encunter il secund candidat Augustin Calivers. Matiu Dermont vegn ad entrar en uffeci immediat, cunquei ch’in post da suprastonza ei vacants. Reelegi ella suprastonza communala da Laax ein Irina Beer-Killias (131 vuschs) e Beat Camathias (121 vuschs).

La radunonza communala ha era approbau il quen annual per 2025 la davosa sonda. Quel siara cun in surpli d’entradas da 3,9 milliuns francs. Ultra da quei ha il suveran da Laax detg unanimamein GIE al niev «Revier forestal Gonda» ensemen cun las vischnauncas da Falera e Sagogn. Ed era unanimamein han las 140 votantas e votants consentiu alla revisiun dil plan da zonas communal pertuccont igl uaul e la selvaschina. (cdm/fmr)