Albin Brun ei niev guardian d’honur sill’Alpsu

«Albin Brun ei ina figura da clav denter la scena dil jazz e la musica populara contemporana en Svizra. El suna en pliras formaziuns ils pli differents instruments e cun quellas ha el concertau a biaras turneas ed en pli che 25 tiaras.» Quei scrivan las organisaziuns da turissem da Mustér Sedrun ed Andermatt, sco era la Fundaziun Tuor da signal Tgina dil Rein en ina communicaziun als mieds da massa.

Installaziun festiva

Quest onn festivescha Albin Brun da Lucerna il giubileum da 50 onns preschientscha sin tribuna. Il musicist ei vegnius distinguius denter auter cul premi d’art e cultura dil marcau da Lucerna igl onn 2013 e cul premi dalla musica svizra igl onn 2017. «Albin Brun careza las muntognas svizras e viandescha savens els cuolms. Quei po haver intimau la Fundaziun Tuor da signal Tgina dil Rein da nominar el sco guardian d’honur dalla tuor da signal sil Pass Alpsu», scrivan las treis instituziuns. Sonda, ils 27 da zercladur 2026 vegn Albin Brun installaus festivamein en sia funcziun sco guardian d’honur sil Pass Alpsu. Suenter la laudatio e la surdada dallas clavs allas 15.00 vegn el a concertar communablamein culs musicists Claudio Strebel e Markus Lauterburg sper la tuor da signal.

Mintg’onn ina persunalitad

Dapi igl onn 2016 nominescha la Fundaziun Tuor da signal Tgina dil Rein mintg’onn ina persunalitad che viva el contuorn dil Rein sco guardian d’honur per in onn. Quei ei stau denter auter il moderatur da televisiun Nik Hartmann, la musicista Sina ni il cusseglier naziunal Martin Candinas. La tuor da signal sil Pass Alpsu marchescha simbolicamein la Tgina dil Rein. Sco ambassadura dalla regiun dalla Surselva ed Andermatt/Ursera duei siu messadi contonscher e muentar aschi bia glieud sco pusseivel per liung dil Rein. La tuor ei aschidadir ina copia dall’anteriura tuor da signal sper la sbuccada dil Rein ella mar a Hoek van Holland. Oz ei quella da veser el Museum Maritiem a Rotterdam.

Promoziun dalla regiun

Cun siu engaschament intenda la Fundaziun Tuor da signal Tgina dil Rein – in’instituziun communizeivla – da promover activitads d’art ed arranschaments turistics en favur dil svilup dalla regiun. Tgi che vul sustener la fundaziun cun ina contribuziun da 100 francs survegn ina box exclusiva cun ina broschura illustrada e la clav dalla tuor. La «clav cotschna dalla tuor da signal» lubescha igl access da tut temps ella tuor sil Pass Lucmagn. Igl unviern ei quei pusseivel duront in temps limitau.