En concurrenza cullas meglieras junioras dall’Europa

La carriera da tir d’Alicia Beer (18) da Rueras para d’ir mo en ina direcziun – numnadamein ensiviars. Dapi ch’ella ha entschiet cul tir sco giuvnetta el stan da sittar dalla Societad da tir Voluntaria Trun marscha ella d’in success a l’auter. Ella ei gia campiunessa svizra dallas junioras silla distanza da 10 meters ed igl onn vargau eis ella vegnida distinguida sco megliera juniora dalla Federaziun da tir grischuna.

In record a Pilsen

Mo Alicia Beer ha era gia mussau excellentas prestaziuns sin plaun internaziunal. Aschia il fenadur 2025 ad ina concurrenza internaziunala da tir dallas tiraduras sut 21 onns a Pilsen ella Tschechia. El match da treis posiziuns cun 60 siets cul caliber pign silla distanza da 50 meters ha ella contonschiu 592 puncts ed ei aschia daventada secunda dallas junioras. Quels 592 puncts ein lu era stai siu record persunal. Quels dis ei suandau in ulteriur punct culminont ella aunc giuvna carriera d’Alicia Beer. Ella ei vegnida selecziunada da Swiss Shooting – la Federaziun da tir svizra – pils Campiunadis d’Europa dalla fin d’avrel ed entschatta matg 2026 ad Osijek en Croazia. Ella concurrenzescha leu ella categoria dallas junioras sut 21 onns.

En ina fetg buna fasa

En vesta als Campiunadis d’Europa di Alicia Beer: «Jeu sun il mument en ina fetg buna fasa. Dapi ch’jeu treneschel el center da prestaziun a Bienna hai jeu fatg in bien svilup. Ils trenaments ein pli intensivs e pli savens ch’jeu siettel e meglier ch’ei va.» Dapi igl uost 2024 ei la Tuatschina occupada cul tir a Biel e habitescha ad Evilard sper Magglingen. Leu vegn ella trenada da Jan Hollenweger. «A mi plai ei fetg bein giu cheu. Las fins d’jamna ch’jeu hai buca da sittar mon jeu a casa a Rueras», di Alicia Beer. Spel sport da prestaziun absolva ella igl emprendissadi mercantil.

Campiunessa dallas junioras

Il slogan d’Alicia Beer ch’ins sa leger silla pagina d’internet ufficiala da Swiss Shooting senumna: «Jeu sietel perquei che la perfecziun fascinescha mei.» Quella fascinaziun semuossa lu era cumpleinamein el stan da sittar. Surtut era ellas concurrenzas. «Sil tetel da campiunessa svizra dallas junioras sun jeu loscha. El ei staus aschidadir la pagaglia per tut engaschament.» Cun 18 onns eis ella ina dallas giuvnas ella categoria tochen 21 onn. Aschia ei quella victoria ton pli remarcabla e muossa il potenzial da svilup che schai ella tiradura sursilvana.

Il final sco finamira

Il viadi als Campiunadis da tir d’Europa en Croazia fa Alicia Beer cun ina clara finamira: «Bugen contonschess jeu il final. Per contonscher quella finamira emprov’jeu da far tut il pusseivel.» Ella vegn a sittar il match en treis posiziuns ed eventualmein era la concurrenza en venter e quella dil team cul caliber pign silla distanza da 50 meters. Alicia Beer ei separticipada il fevrer vargau al Campiunadi d’Europa dil tir da 10 meters en Bulgaria. Aschia ha ella gia saviu guder l’aria d’in campiunadi internaziunal: «Culs resultats sun jeu buca stada cuntenza leu. Probablamein level jeu da memia e hai aschia fatg memia bia squetsch sin memezza.» Quella ga eis ei auter: In’autra arma ed in’autra distanza.

E lu al Campiunadi mundial?

«La distanza da 50 meters ei mia preferida, surtut la concurrenza en treis posiziuns.» La participaziun als Campiunadis d’Europa vul Alicia Beer nezegiar per far in ulteriur pass anavon sin plaun internaziunal. La proxima finamira ei gia clara: «Gliez fuss il Campiunadi mundial la secunda mesadad dil zercladur vegnent en Germania.» Schebein quella finamira severifichescha dependa buca mo, mobein era, dils resultats en Croazia. Sper siu engaschament el center da prestaziun a Biel ha Alicia Beer era sittau igl unviern vargau cul team dalla Societad da tir Voluntaria Trun ella ligia naziunala da 10 meters.