Tuns e suns a favur da la Büvetta
Ün’ottantina da chantaduras e musicists indigens s’han chattats l’ultima dumengia i’l Hotel Scuol Palace. E quai na per dar ün concert per l’agen bön, dimpersè per ramassar raps a favur da la sanaziun da la Büvetta a Nairs sper Scuol.
Prosma dumengia, ils 19 avrigl 2026 decidan las votantas ed ils votants dal cumün da Scuol davart l’avegnir da la Büvetta a Nairs sper Scuol. L’edifizi chi’d es tenor l’Uffizi federal da cultura da valur significhanta a livel naziunal, douvra urgiaintamaing üna sanaziun. Planisats sun cuosts totals da raduond 18 milliuns francs per quista sanaziun. Da quels stuvess il cumün da Scuol surtour 3,7 milliuns francs.
Per far attent a la votaziun e ramassar raps a favur da la società Pro Büvetta Tarasp, ha la musicista da Scuol, Cinzia Regensburger organisà la dumengia passada i’l rom da seis concerts da «Viva la Musica» ün concert da benefizi i’l Hotel Scuol Palace.
Dürant il decuors dal davomezdi e la saira han ils raduond 200 preschaints e preschaintas pudü giodair ed impustüt tadlar ün’ottantina da chantaduras e musicists indigens (guarda boxa). Üna dumengia in cumpagnia cun tuns e suns davent da musica classica, musica populara, al chant coral, sur jazz, blues e pop fin a musica da trategnimaint, e quai pel bön ed avegnir da la Büvetta a Nairs.
Concert da benefizi Büvetta – üna survista
- Paulin Nuotclà
- Ernst Bromeis
- Differentas scolaras da la Scoula da musica Engiadina Bassa/Val Müstair
- Cinzia Regensburger
- Coro Scuol Classics
- Isabella Kania
- Che Bo
- Coro Viril Scuol
- Ils 7 Nanins
- Mi’Amia
- DJ Mendu (fmr/dm)
Gust da leger dapli?