Il radio e la televisiun da plü bod

Il vamporta. La prüm’ögliada, eir be cuorta, ans dà ün’impreschiun da la persuna, ögls blaus, frisura e la posiziun da la bocca at pon dir, scha quella es plütost bain sü da cheu o plütost reservada. In mincha cas, scha la persuna es tschantada sül banket dal vamporta, sto que esser ün hom e plü vegl. Uschea as vaiva impissà barb’Artur illa Tevletta, sül banket dal vamporta d’eira Pol, il non, chi füma la püpa, pppp, e fingià cugnuoscha l’uffant ün nouv custab, il P. Da far imprender hoz als bruozzalets in scoula il P cun la püpa e’l non, maness hoz ad ün s-chandel public.

Il non nu controlla be que chi va aint ed oura, el controlla eir l’entrada suot, là ingio cha las vachas van a bügl o tuornan dal pas-ch. Minchatant daja eir ün salüd o ün pêr pleds cul vaschin o cun ün passant. Qua e là d’insta nu’s vezza il bazegner tschantà sül banket, na, i’s doda ün cling suord a l’entrada da la porta d’stalla. El batta la fotsch per cha quella taglia la daman davo, cur cha’ls praders van sü Muottas a sgiar.

Il vamporta es il reginam dals homens, dals vegls, qua han els tuot suot controlla, qua sun els libers da la travaglia, qua pon els as laschar ir e giodair il film dals temps passats. Ma halt, qua es eir Nann’Engel sül vamporta a Bever chi sta quintand las parablas da l’homin dal chapè agüz o quella da las trais strias. Ils uffants taidlan e taidlan cun uraglias spalancadas: Amo üna Nann’Engel! Sül vamporta gniva baderlà, quintà, fantisà dad inguotta e da tuot. Scha Freud füss stat ün Engiadinais, vessa’l tschernü il vamporta sco canapè da terapia …

Il balcun tort. D’eira il vamporta plütost la domena dals homens, il balcun tort es il lö predilet da las duonnas, da las nonas. In üna da las plü bellas poesias ans maina Peider Lansel aint in stüva, id es ün di d’avuost, ora per far cul fain, la mammaduonna be suletta pro’l balcun, coura sün via tribulöz e fracasch, quaint il monoton tic-tac da l’ura, cunter ils vaiders dal balcun cloccand ün tavan pers chi schuschura, la mammaduonna stangla e culs mans in crusch ha tut cumgià dal muond, es pronta per posar per adüna. Tschel balcun tort ans muossa darcheu la nona, ella es amo interessada per que chi capita dadoura sün plazza, duonna Clergia fa altschiva, duonn’Aita s’intrategna cun ella, intant cha giunfra Ottilia passa speravia sainza dar pled, tipic adüna as dar da signura e massa bella per as dar giò cun tschellas, e là passa il sar ravarenda ed i vain tuot quiet cavia pro’l bügl, las duonnas fan la reverida cun ün salüd da meil d’aviöls.

Il balcun tort es tuot, gazetta, radio, televisiun e lö dal pos, dal far inguotta, dal nu stuvair far inguotta, dal as laschar manar in muonds eterns e lontans. Sömmis da quai chi nu s’ha fat e chi’s vess gugent fat e da quai chi s’ha fat e chi’d es gratià.

Romedi Arquint è teolog ed era scolast e politicher. Tranter auter è el stà president da la Lia Rumantscha e da l’Uniun federalistica da las cuminanzas etnicas europeicas (UFCE). Quest text furma la basa per dus «Impuls» che vegnan emess previsiblamain questa stad tar RTR.