Lectura Rumantscha

La gigina fa effect

Trais onns ha l’Uniun per la Litteratura Rumantscha (ULR) stuì far gigina finanziala. Ma la cura sfurzada ha gì effect. L’onn passà ha l’ULR fatg in bel gudogn, vul dir radund 12 500 francs, e po metter tiers in pau panza. Sco che la presidenta Manuela Balett ha ditg, restia tuttina ina sfida da finanziar l’ULR e sias activitads. Perquai na saja betg garantì ch’ils onns maghers tutgian definitivamain al passà.

Dependenzas finanzialas

La vischnanca da Breil dependa dal turissem. Quai di il president communal Roman Flepp. A medem temp dependa er il turissem a Breil finanzialmain da la vischnanca, almain las pendicularas. Era quai di il president ch’è dapi 100 dis en uffizi. Tgi che ha las hottas enta maun, quai n’è damai betg propi cler. Cler è però che las pendicularas èn en ina situaziun finanziala difficila e che la vischnanca è pronta – u sfurzada (?) – da gidar.

Il final en mira

In bun egl, ina buna concentraziun ed ina buna purziun perfecziunissem – quai dovri almain sco basa per il sport da tir. Tanscher na tanscha quai dentant betg per far part da l’elita mundiala. I dovra era buns trenaments per far carriera, sco che la tiradura da Rueras Alicia Beer constatescha. La giuvna da 18 onns trenescha a Bienna en il center da prestaziun ed ha en mira il final als Campiunadis da tir d’Europa.

Bun divertiment cun la Lectura Rumantscha!