«Sin quels pass era in’atmosfera particulara»
Las fieras cun products regiunals sils pass han buca pli liug. Alpinavera, l’organisatura da quellas, argumentescha la decisiun culla strategia dils producents regiunals. Pli e pli nezegian quels auters canals da vendita. Marcus Duff ch’ei staus confundatur dallas fieras sils pass deplorescha la decisiun.
«Suenter biars onns da bien success sils pass Alpsu, Klausen, Lucmagn e Gottard han las fieras buca pli liug igl avegnir.» Quei ha Alpinavera, l’inizianta e coordinatura dallas fieras, communicau dacuort als mieds da massa. Biars onns seigien las fieras stadas ina part integrala «dalla stad alpina». Ellas seigien stadas in punct culminont ton per indigens sco turists. «La culissa da muntogna spectaculara ei stada ina plattafuorma ideala per presentar e vender specialitads regiunalas», scriva Alpinavera. Las fieras sils pass ein vegnidas organisadas rodund 20 onns.
L’emprema ga 2008
Igl onn 2008 ha l’acziun «Enjoy Switzerland» da Sedrun Mustér Turissem cun Svizra Turissem lantschau l’idea dallas fieras sils pass Lucmagn ed Alpsu. «Il responsabel Mattias Nutt ha clamau entgins marcadonts ad ina sentupada. Spert ei igl interess per talas fieras semussaus», seregorda Marcus Duff da Laus ch’ei lu staus aschidadir in dils confundaturs dallas fieras sils pass. El era lu president dall’Uniun fiera jamnila da Glion ed aschia ei il contact cun Mattias Nutt sedaus. En ina gruppa da lavur ein ils emprems termins vegni fixai e 2008 han las duas empremas fieras sil Lucmagn ed Alpsu allura giu liug.
Alpinavera al tgamun
Damai che l’acziun «Enjoy Switzerland» ei ida a fin gliez onn ha ei giu num s’organisar da niev. «Cun Alpinavera havevan nus gia contact aschia che lezza organisaziun ei lu sedeclarada promta da surprender l’organisaziun naven digl onn 2009», di Marcus Duff. Las fieras sils pass dil Klausen e Gottard ein lu suandadas bein spert. Gia allas empremas fieras ein 25 marcadonts separticipai, il diember ei lu carschius entochen sin 30. Ils stans vegnevan menai d’ina interpresa dalla Purtenza sils pass. «Logisticamein eran quellas fieras ina sfida. D’ina vart ils viadis e da l’autra vart l’infrastructura necessaria», di Marcus Duff.
«Jeu deploreschel la fin»
«Sin quels pass era in’atmosfera particulara. Saver porscher nos products si leu era semplamein zatgei tut special e bia auter ch’en in vitg», di Marcus Duff ch’ei presents a pli u meins tuttas fieras ella regiun cun sias specialitads. El appreziavi era il contact regular cun auters marcadonts: «En quels onns ein era sedadas aschia bialas amicezias. La collaboraziun da marcadontas e marcadonts da plirs cantuns era secumprovada.» Marcus Duff ei separticipaus tut ils onns allas fieras sils pass e deplorescha ussa la fin da quellas: «Forsa ch’jeu vegn tonaton ad esser presents ina ga ni l’autra sil Lucmagn ni l’Alpsu igl avegnir.» L’infrastructura persuenter ha el. Dil temps dallas fieras sils pass seregorda era Sep Benedetg Candinas da Sumvitg: «Nus essan separticipai a quellas cull’organisaziun Amarenda. Quei ei stau in bi temps, schegie ch’ei era magari aura criua.»
Novs canals
«Il motiv che quei capetel cun fieras dils pass vegn serraus, ei buca d’attribuir alla munconza d’interess. La fascinaziun ed il sustegn maunca buca tier las numerusas visitadras ed ils numerus visitaders, era buca tier las vischnauncas ed instituziuns che han possibilitau las fieras», scriva Alpinavera. La fin dallas fieras dils pass hagi plitost motivs pragmatics. «Il mintgadi e las structuras dils producents ein semidai. Els han strusch pli il temps d’esser presents sils pass las fins d’jamna», constatescha Alpinavera. In factur ei la sfida geografica. Il radius dils menaschis che separticipavan allas fieras entuorn ils pass ei enorms. «Il viadi dalla Val Müstair sil Pass Alpsu muossa a moda impressiunonta con gronda che la distanza ei e tgei che quei munta pils producents ord vesta dalla logistica», scriva Alpinavera.
Dapli vendita via online
Ils davos onns han biaras producentas e biars producents scaffiu agens canals da vendita. «Quei svilup ei in mussament d’ina ferma professiunalisaziun dils menaschis», scriva Alpinavera. Biaras e biars han lur agens shops online. La vendita da vivonda online ei semultiplicada ils davos decennis. Da quei profiteschan era producents en regiuns ruralas. Il medem mument han era las cadeinas regiunalas cun contacts per exempel tier la gastronomia saviu vegnir rinforzadas. Sco Marcus Duff di, ei il cumpurtament dalla clientella semidaus suenter il temps da corona: «La fiera da cumpra da products online ei carschida dapi lu.»
Gust da leger dapli?