Gion A. Caminada referescha davart l’architectura per la cultura

La cultura da construcziun nescha tras ina confruntaziun intensiva cul liug sco era cun in’architectura che tracta a moda nizeivla e cunscienta la construcziun, il material ed il spazi. Sco l’organisatura dil referat, TujetschVivaCultura scriva en ina communicaziun als mieds da massa, ein quellas cundiziuns colligiadas cun emoziuns, eveniments e casualitads. Per in’architectura cun ina pretensiun d’ina relevonza sociala ein sentupadas culla realitad dil mintgadi indispensablas. Aschia era a Sedrun. La sfida da construir igl Archiv cultural Tujetsch ei stada da colligiar il mintgadi cul special. Il tema l’architectura per la cultura stat el center dil referat digl architect Gion A. Caminada sonda, ils 18 d’avrel 2026 allas 09.00 egl Archiv cultural Tujetsch a Sedrun.

Svaniu ni daventau pli concret

Avon strusch in onn ei igl Archiv cultural Tujetsch vegnius aviarts. «Nies siemi cumineivel ei vegnius realisaus», scriva TujetschVivaCultura. El decuors dil process viviu e cumpurtau ei beinenqual caussa semidada. Diversas ein svanidas, autras ein daventadas pli concret. «Nus mirein ussa (criticamein) anavos e rapportein davart temas che han occupau duront quei temps, sco era davart quei che ha influenzau il process dalla construcziun digl archiv», vegn Gion A. Caminada citaus ella communicaziun als mieds da massa.