La bellezza e serenezza d’ina sentenzia rumantscha
I dat gea persunas – cunzunt derschadras u actuars da dretgiras – che pretendan stinadamain ch’i na saja betg pussaivel da scriver per rumantsch davart fatgs giuridics. A tut questas persunas cussegl jau da leger la sentenzia 1C-160/2012 dal Tribunal federal. Ella è d’ina bellezza e serenezza linguistica admirabla che mo in tractat giuridic rumantsch po cuntanscher.
I sa tracta era d’ina raritad. Il Tribunal federal scriva gea uschiglio ses verdicts per tudestg u franzos, magari per talian. En quest cas dentant betg. Las 17 paginas èn formuladas en il pli stget rumantsch grischun imaginabel. Tenor mes avis fissi dad obligar tuttas derschadras e tuts derschaders che lavuran en regiuns rumantschas dad emprender ordador questa sentenzia – per ch’els n’emblidian mai quant tgunsch che fatgs giuridics sa laschan declerar per rumantsch.
U èsi forsa gist il cuntrari? Èsi la lingua rumantscha che ha sfurzà ils derschaders da betg far cumplitgims? En bleras sentenzias tudestgas vegnan savens duvrads flosclas giuridicas cumplitgadas che mo insiders chapeschan. Da talas flosclas vegn desistì en la sentenzia rumantscha. Tut è scrit a moda chapaivla.
Dal reminent vai per la dumonda quant svelt ch’ils autos dastgan charrar sin la via principala tras Sumvitg. Ils derschaders han dà raschun a tschintg abitants da Sumvitg. Lezs han pretendì tempo 30 sin la via principala. La secziun grischuna dal Touring club, che leva impedir gliez, ha tratg la curta. La sentenzia deriva dal 2012. Il tema è oz – che tempo 30 vegn cumbattì dapertut – actual pir che mai.
Di per di dat ina redactura u in redactur da la FMR in tip a lecturas e lecturs – in cussegl u ina recumandaziun, senza impegn e senza garanzia che quel «tip» plaschia alura a tuttas e tuts.
Gust da leger dapli?