Per electronica, plastic, neofitas e pastg

Sco biaras autras vischnauncas rimnava era Trun duas ga per onn il rufid bloccont da vischinas e vischins. Duas entochen treis muldas grondas vegnevan emplenidas ed allura menadas silla deponia ufficiala. Per curdems da caglias e pastg disponeva la vischnaunca d’ina deponia dado il campadi a Trun. «Quella havein nus stuiu serrar sin camond digl Uffeci cantunal per ambient e natira», di il president communal Dumeni Tomaschett. Il motiv: La deponia sesanflava en ina zona d’ogna da muntada naziunala.

Ina soluziun cumplessiva

Sin fundament da quella pretensiun digl uffeci ha la vischnaunca buca mo tschercau ina soluziun per curdems verds, mobein pigl entir rumien bloccont. Il liug ideal persuenter ha ella cattau leu nua ch’il plaz da ballapei da trenament sesanflava. «Quel vegneva buca pli duvraus dil club da ballapei. Perquei motiv e damai che la surfatscha ei adattada per in center da rimnada, havein nus decidiu d’installar quel leu», di Dumeni Tomaschett. Parallelamein cul project per quei center numnaus Cuort da rimnada Ogna, ha la vischnaunca da Trun era decidiu d’installar molocs per la rimnada dils sacs da rumien ufficials en vischnaunca. «Ils 20 molocs remplazzan las casettas da rumien. Per part han ils molocs saviu vegnir plazzai en connex cun sanaziuns da vias ni che quei ei succediu entras il menaschi tecnic dalla vischnaunca», di Albert Spescha ch’ei responsabels pil menaschi tecnic dalla vischnaunca. La cuort ei vegnida aviarta ufficialmein ils 28 da mars 2026. «Igl ei ina purschida per l’entira populaziun e per nossas interpresas. Persuenter havein nus gia retschiert biars buns resuns. Zatgei aschia haveva veramein da basegns», constateschan ton Dumeni Tomaschett sco Albert Spescha.

Surveseivel e pratic

La Cuort da rimnada Ogna ei accessibla cun vehichels e consista da dus baghetgs principals. In – aschidadir cun dus gronds caums – ei reservaus per curdems da curtgin e caglias che vegnan menai da temps en temps en in indrez da cumpostar a Landquart. Il secund baghetg inclusiv posts da rimnada entuorn quel ei endrizzaus per tut igl auter rumien ch’astga ni duess buca vegnir dismess els sacs da rumien ufficials, respectivamein verds. Aschia per exempel battarias, electronica, ieli da cuschina e da motors, textilias e calzers, plastic ni era curdems minerals. Las informaziuns tgei che sa vegnir dismess, respectivamein buca dismess, ein da cattar all’entrada ella cuort. Leu ein era ils prezis indicai per quei ch’ei da pagar per dismetter, sco era ils temps exacts dall’avertura dalla cuort. Per eruir ils prezis stat ina stadera a disposiziun. Per differentas sorts da rumien bloccont ei ina part dalla cuort aviarta da tut temps. Duront il temps d’avertura ufficial dalla cuort ei la dismessa dil rumien bloccont survigilada.

Cun lenna indigena

La Cuort da rimnada Ogna ha custau rodund 800 000 francs alla vischnaunca. La planisaziun e construcziun ei succedida entras interpresas dalla vischnaunca, respectivamein dalla regiun e cun sustegn dil menaschi tecnic dalla vischnaunca. La lenna ch’ei vegnida nezegiada per ina gronda part dils baghetgs ei vegnida procurada digl uffeci forestal communal. La cuort ei vegnida cumpletada cun in pign baghetg pil persunal da survigilonza.