Schluein: Renviau il quen dil consorzi da scola

Il president communal da Schluein Ralph Schläpfer ei vegnius reelegius il davos mardis sera sco president communal cun 39 vuschs tier il pli absolut da 25 vuschs. Ultra da quei ei era Corsin Bearth vegnius reelegius en suprastonza. Sco niev suprastont ha il suveran da Schluein elegiu Adrian Schlund che supren igl uffeci da Simon Casanova. El haveva demissiunau. La radunonza communala da Schluein ha denton renviau il quen dil consorzi da scola Laax, Falera, Sagogn e Schluein. La suprastonza communala haveva proponiu d’approbar il quen da scola, mo la radunonza ha detg NA a quella proposta. Sco quei ch’il president communal Ralph Schläpfer ha detg sin damonda dalla FMR, prendi la suprastonza communala buca posiziun tier quella decisiun el mument.  Approbau unanimamein ha la radunonza communala da Schluein il quen annual da vischnaunca digl onn 2025 che siara cun in surpli d’expensas da ferm 350’000 francs. (cdm/fmr).