Il suveran decida davart la tuor

Sco quei che Lukas Hammer e Mitch Buvoli dalla White Pillow Park SA scrivan en ina communicaziun dils 15 d’avrel 2026 hagien els evaluau adumbatten divers loghens turistics per realisar lur indrez da trenament da stad per sportistas e sportists dil stil liber. Per munconza da plaz en auters loghens han ils iniziants dalla schanza da siglir e dalla mesapipa artificiala la finala anflau in liug adattau ella zona da commerci a Glion/Grüneck gest ella vischinonza da Strada. Ina surfatscha dad 1,5 hectaras ch’ei per part en possess privat e per part en possess dalla vischnaunca da Glion. Sco quei ch’ils iniziants scrivan ella communicaziun ein els leds d’haver anflau possessurs da terren che paran dad esser aviarts per il project. «Nus vulein impedir liungs process politics ed essan perquei seconcentrai sin la zona da commerci existenta», selain ils dus iniziants udir via communicaziun.

Silmeins 30 meters

Senza process politic va ei lu tuttina buc ed in dils craps da scarpetsch vegn la tuor ad esser ch’ei part dalla schanza da siglir. Sco quei che Lukas Hammer gi viers la FMR vegn quella tuor ad esser sil pli pauc 30 meters aulta. «Forsa era empau dapli.» La tuor ei necessaria per che sportistas e sportist san pigliar catsch per siglir sur la schanza. Per la zona da mistregn Grüneck vest definescha la lescha communala da baghegiar denton sulet ina altezia maximala da 15 meters per in baghetg. Ch’ei drova ina revisiun locala dalla planisaziun per realisar en quei liug ina tuor da varga 30 meters conceda il canzlist da Glion, Michael Spescha. Cunscients da quella restricziun ei era Lukas Hammer che spera sin la beinvuglientscha dil suveran dalla vischnaunca da Glion che sto la finala approbar la midada da zona per realisar la nova tuor alva da Glion.

En tut vul la White Pillow Park SA investar treis milliuns francs sin las 1,5 hectaras e Grüneck. Lukas Hammer tschontscha dad 1,5 milliuns capital agen che la societad sa e vul investar el parc da freestyle. «Nus quintein secapescha cun ina considerabla contribuziun neu dalla promoziun publica da sport.» Lukas Hammer fa attent ch’ei detti negins semeglionts indrezs da trenament da stad per sportistas e sportists dil stil liber ell’Europa. «Tals indrezs dat ei per exempel ella China ni Giapun, Nova Zelanda ni l’Australia.» In mussament per Lukas Hammer che las atletas ed ils atlets da quellas tiaras domineschan pli e pli fetg il sport dil stil liber.

Colligiar Grischun cun Tessin

Ella communicaziun fan ils iniziants dil parc era attent alla colligiaziun denter Grischun e Tessin che vegni rinforzada cun realisar il White Pillow Parc a Glion. Mitch Buvoli, il cuiniziant dil project da Glion ei numnadamein era confundatur dil White Pillow Snowboard Club dil Tessin che trenescha regularmein duront igl unviern a Laax. Grazia e quella colligiaziun sur il cunfin Tessin/Grischun quentan ils iniziants era cun daners neu dalla San Gottardo.

L’organisaziun installada cun sustegn dalla Confederaziun dils cantuns Tessin, Uri e Grischun per promover l’economia entuorn il Gottard. Lukas Hammer tschontscha en quei connex dad in emprest senza tscheins. Che treis milliuns francs ei buca gest ina gronda summa per realisar in tal indrez conceda era Lukas Hammer. El gi ch’ins vegli buca realisar stabiliments fixs. «Per exempel vegnan ils indrezs sanitars mess a disposiziun en containers.» El fa attent ch’il parc seigi aviarts sulet la stad aschia ch’ei detti avunda temps duront igl unviern da sepreparar sin la proxima sesiun.

Via communicaziun fan ils iniziants a saver che lur parc da trenament duei buca mo star a disposiziun a sportistas e sportists d’elita, mobein era ad ina e scadin che vul sedivertir ella mesapipa artificiala che duei esser aschi gronda sco quella dil unviern sil Crap sogn Gion. Ed ils iniziants empermettan ulteriura purschida da temps liber el White Pillow Park a Glion, sco la pusseivladad d’organisar events culturals. E forsa san ins mirar sin Glion giu dalla nova tuor alva da 30 ni dapli meters a partir dalla stad 2028.