In NA che irritescha

Il basegns da discuorer para dad esser empau limitaus suenter il NA dalla radunonza communala dalla vischnaunca da Schluein dil margis vargau viers il quen dil consorzi da scola dallas vischnauncas da Laax, Falera, Schluein e Sagogn. La radunonza ha renviau il quen cun 28 encunter 25 vuschs sco quei ch’il protocol dalla radunonza communala tradescha. Viers la FMR ha il president communal, Ralf Schlaepfer fatg attent che la suprastonza prendi per il mument buca posiziun en caussa consorzi da scola sco quei ch’ins ha saviu leger ella LQ dils 15-4-2026.

Sco ei para ha Ralf Schlaepfer lu tuttina seschau perschuader da gir enzatgei en caussa. Viers RTR ha il president communal fatg attent che la populaziun seigi malcuntenta cun ils cuosts dalla scola populara che creschien ad in crescher. Il quen 2025 seigi visavi al preventiv 2025 in bien ton pli aults, in fatg che hagi caschunau malaveglia el ravugl dalla radunonza communala, ha il president communal fatg a saver.

Cun temps e peda

Ralf Schlaepfer fa part alla cumissiun da scola da cuminonza cun Franz Gschwend e Norbert Good, ils presidents communals da Laax e Falera. Cun els ella cumissiun sesa Daniel Tugger sco representant dalla vischnaunca da Sagogn. Presidiada vegn la cumissiun da Giuseppe Puopolo che ha da cuminonza cun il meinascola Felix Rösel presentau il quen dil consorzi alla radunonza communala da Schluein. Sco ei para eis ei buca reussiu al duo da perschuader il suveran da Schluein daco che las expensas dil menaschi da scola ein carschidas visavi al preventiv. Tenor informaziuns ord il ravugl dalla radunonza communala setracta ei dad ina summa dad 800 000 francs. Ina summa che augmenta las contribuziuns dallas singulas vischnauncas al menaschi da scola.

L’administraziun dil consorzi da scola ha sin damonda dalla FMR getg ch’ins hagi retschiert l’instrucziun da buca commentar fatgs interns dalla vischnaunca da Schluein. Via e-mail ha il president dalla cumissiun da scola Giuseppe Puopolo giavischau damondas a scret davart ils puncts dispiteivels dil quen e fatg attent al temps da vacanzas ed alla veglia da rispunder cun temps e peda.

Priu peda

Peda per prender posiziun ha il president communal da Falera, Norbert Good, priu. El ha getg ch’ils cuosts carschents dil menaschi da scola seigien secapescha in tema ella cumissiun e quei seigi gia stau il cass avon la radunonza communala da Schluein. «Igl ei buca da snegar ch’ils cuosts dil menaschi da scola creschan ad in crescher.» Per Norbert Good ei la situaziun el scolaresser en quei grau da paregliar cun il sectur da sanadad. «Nus vegnin per exempel a stuer discutar davart il diember da scolars da singulas classas.» En quella direcziun ei era il president communal da Schluein s’exprimius viers RTR. Ord sia optica ein ils cuosts da persunal il grond post d’expensas dil quen da scola.

Prender peda da ponderar

Alla damonda co vinavon ha Norbert Good alla cuorta buca saviu rispunder. «Clar ei che tuttas quater vischnauncas dil consorzi ston tenor statuts approbar il quen.» Entochen uss ha sulet la vischnaunca da Laax approbau il quen dil menaschi da scola. E tgei ch’ei da far, sch’ina vischnaunca renviescha il quen dil consorzi ei buca definiu els statuts. Il president communal vegn en scadin cass a discutar la situaziun en sia suprastonza. «Sche la suprastonza communala da Falera va d’accord, vegn jeu a suttametter il quen dil consorzi da scola alla radunonza communala dil zercladur 2026.» E clar ei per il president communal da Falera che la cumissiun da scola vegn a sefatschentar cun la damonda co vinavon.

Sper il quen dil consorzi da scola ei la radunonza communala da Schluein era sefatschentada il margis vargau cun il quen communal 2025. E quei quen ha la radunonza approbau unanimamein. Part da quei quen ein secapescha era las expensas communalas per il menaschi da scola ch’il suveran ha en quei cass acceptau.