Ün’excursiun per cuschinar üna tschaina

Il concept da far cumischiuns e mangiar s’ha müdà cumplet pro mai quia a Trinidad. In Svizra n’haja ün menü in meis cheu e vegn lura aint il supermarchà ingio ch’eu chat tuot las ingredienzas. In gnanca ün’ura es mia tas-cha da cumpras lura implida ed eu sun in viadi vers mia chadafö.

Quia a Trinidad funcziuna quai viceversa: Eu vegn a far las cumpras e tuot tenor che ingredienzas ch’eu chat, planisescha lura mia tschaina.

Cura ch’eu sun rivada la prüma jada in quist chantun dal muond avant 13 ons, nu daiva ingünas butias da mangiativas, ingio chi’s vess pudü entrar. Eir hozindi vegnan las cumischiuns fattas impustüt pro butias chi sumaglian ad üna sort kiosc: I’s dà sü la postaziun e la persuna da vendita metta insembel las cumpras. Per furtüna nu daja üna gronda schelta da differentas sorts da mangiativas: ris es ris e pasta es pasta. Il luxus da basmati, jasmin, penne, spaghets nu cugnuoschan quistas pitschnas butias. Daspö ün pêr ons daja duos supermarchats chi sun transibels ed eu bivgnaint fich ch’eu poss tour svessa mias cumpras giò da la curuna e nu stögl comunichar davant il mez cumün che ch’eu cuschinarà hoz e ch’eu cumpr fingià darcheu tschiculatta e chips.

Ingredienzas frais-chas sco verdüra e frütta vegnan vendüdas impustüt in marcurdi ed in venderdi. Lura vain roba frais-cha dal marchà central a la costa, e la glieud indigena chi planta svessa offra sia racolta. Dimena esa d’avantag da planisar las aignas cumpras. La roba frais-cha vain vendüda per gronda part da pitschnas chamonnas o sün maisas da lain sper la via principala. Eir quia resta la tscherna modesta. I nu dà diversas sorts da tomatas, ingünas salatas differentas. Eu guard da cumprar aint uschè local sco pussibel e desist da las carottas da Costa Rica e da l’üa dals Stadis Units da l’America. Per furtüna am proveda meis üert cun üna gronda schelta da frütta. Direct dal bös-ch, cun variaziun stagiunala e garanti frais-ch.

Pro l’unica bacharia in quista regiun daja differentas sorts da chaschöl, impè dal chaschöl cheddar chi vain uschigliö vendü dapertuot. Per mangiativas plü exclusivas sco chaschöl da mozzarella, parmesan, olivas etc. esa però dad ir in ün plü grond supermarchà aint illa prosma cità.

Meis bun tip es il tancadi chi ha eir üna pitschna butia ed üna bar ed es in mans chinais. La famiglia chinaisa planta svessa verdüra e frütta, tuottafat sainza chemicalias. Eu toc probabelmaing pro las pacas persunas chi passan là per bananas biologicas e nöglia per rum.

Far cumischiuns per üna tschaina es a Trinidad dimena svelt ün’excursiun d’ün mez di cun plüs stops. Id es ün mix da planisaziun, flexibiltà ed improvisaziun.

Manuela Giger viva a Trinidad & Tobago, nua ch’ella maina in’organisaziun da nonprofit.