Ün SCHI da la populaziun per la Büvetta

S-chars trais quarts da las votantas e’ls votants han in dumengia approvà la proposta dal cumün da Scuol per instradar davo duos decennis stagnaziun la restoraziun da la Büvetta Tarasp a Nairs. Cun 751 vuschs SCHI cunter 294 NA es gnü decis da sgürar il grip sur la Büvetta e da sanar l’inchaschamaint da las funtanas cun üna partecipaziun finanziala dal cumün da var 3,7 milliuns francs e da conceder ils suotdrets da fabrica per tour per mans la restoraziun da la Büvetta e la Chasa Carola güst daspera.

«Eu n’ha sperà chi detta ün resultat cler, ma nu vess fat quint cun ün sustegn uschè grond», disch Aita Zanetti, il capo da Scuol. «Il pass decisiv per cumanzar cullas lavurs es uossa fat.»

Fundaziun Büvetta Tarasp surpiglia la lavur

Il prossem pass es lura quel d’eriger la Fundaziun Büvetta Nairs. Quella surpiglia dal cumün per 60 ons il suotdret da fabrica süllas parcellas pertoccas ed es uschea eir respunsabla per las lavurs da restoraziun e davo per la gestiun da la Büvetta.

«Il resultat da la votumaziun am fa grond plaschair», disch Christian Müller, il manader da proget incumbenzà da la Società Pro Büvetta Tarasp per la sanaziun. «Cun quella es uossa fat ün pass fich important, ma i restan amo sfidas.»

Garantir finanziaziun cumpletta

Christian Müller sarà eir commember i’l cussagl da la nouva fundaziun. Avant cha las lavurs concretas pon cumanzar a Nairs, sto la fundaziun il prüm amo rablar insembel ils raps mancants per cha tuot las lavurs sajan finanziadas.

Tuot in tuot vain calculà cun cuosts da 18 milliuns francs per sgürar la costa sur la Büvetta e’l mür vers l’En, per sanar l’inchaschamaint da las funtanas d’aua minerala e per darcheu metter ad ir la Büvetta. Ils var 3,7 milliuns cha la populaziun da Scuol ha uossa dat liber correspuondan ad ün tschinchavel dals cuosts totals. Las instanzas chantunals e federalas invoutas han impromiss insembel bundant 9 milliuns francs. Ils 4,5 milliuns francs chi mancan amo sto la fundaziun svess rablar insembel. «Nus eschan fingià landervia da tscherchar sustegn finanzial. Quant lönch chi dürarà amo fin cha la finanziaziun es garantida, nu’s poja intant amo dir», disch Christian Müller.

I’l cas ideal as pudessa cumanzar culla lavur amo vers la fin da quist on. «Il proget es insè pront», disch Aita Zanetti, «la dumonda da fabrica es inoltrada.» E Christian Müller agiundscha: «I nun es be üna dumonda d’optimissem da cumanzar uschè svelt pussibel culla sanaziun. Eir l’urgenza pervi dal nosch stadi dal stabilimaint pretenda quai.»

Approvà eir prüm pass per s-chodamaint a distanza

Sper las formalitats per sanar la Büvetta han las votantas e’ls votants da Scuol eir dit SCHI ad üna revisiun parziala da la planisaziun cumünala. Cun quella es accumplida la precundiziun per realisar a Sot Ruinas i’l südvest da Scuol üna centrala da s-chodar cun ün silo per ziplas da lain. A quella revisiun ha il suveran dit SCHI cun 759 cunter 257 vuschs.