Il Burleun ei venals

En ina communicaziun allas medias scrivan las pendicularas da Breil igl emprem da matg 2026 da sentiments da primavera. Ellas scrivan da vuler carmalar ils hosps cun ina viseta ell’aria frestga da muntogna, fan queidas cun gis pli liungs ed emprems sentiments da stad.

Per far gust da planisar las empremas turas el cuolms annunzian las pendicularas da metter en funcziun la sutgera da Breil a Crest-Falla dad Anceinza, da Tschuncheismas, da Sontgilcrest ed a partir dils 20 da zercladur 2026 entscheiva il menaschi da stad ordinari. Dalla pusseivladad da guder la biala vesta sin la terrassa dalla ustria da muntogna Burleun a Crest Falla sin 1725 meters sur mar scrivan las pendicularas denton nuot. Ils hosps ston secuntentar cun il panorama dalla ustria da val, La Famusa.

Ustria ei venala

Igl ei era buca da far curvien che las pendicularas scrivan nuot dalla ustria Burleun. Per l’ina e l’ustria da muntogna dapi prest nov onns en possess dalla Gastro Event SA e per l’autra serrada dapi ils 15 da mars 2026. E las schanzas che quella ustria arvi dad Anceinza ein buca fetg grondas.

Sco quei che la Gastro Event SA ha gia fatg a saver a caschun dalla fin dalla sesiun d’unviern 2026 ei l’ustria venala. Igl inserat sil portal da vendita da Gastro Suisse, l’organisaziun tetgala dalla gastronomia svizra, datescha dils dudisch da fevrer 2026 ed ei vegnius actualisaus ils nov d’avrel 2026. Davart il prezi da cumpra dalla ustria Burleun tradescha igl inserat che fa gust per in menaschi cun 130 plazs da seser egl intern e cun 280 plazs sin terrassa nuot. Persuenter tradescha igl inserat ch’ei seigi pusseivel da surprender l’ustria sin l’entschatta matg 2026 ni tenor cunvegnientscha.

Interessenza ei avon maun

Cun surprender l’ustria Burleun sin l’entschatta matg eis ei nuot. Quei conceda il president dil cussegl d’administraziun dalla Gastro Event SA, Peter Brügger sin damonda dalla FMR. Las schanzas che l’ustria arva pli tard sin l’entschatta dil menaschi regular da stad dallas pendicularas ein tuttina intactas, sco quei che Peter Brügger conceda. «Igl interess per cumprar l’ustria ei avon maun.»

Biars dils interessents ein tenor las explicaziuns da Peter Brügger denton buca pertscharts dallas sfidas da menar ina ustria da muntogna. Tuttina manegia el da secunvegnir la finfinala cun in dils interessents. «Scochemai ch’il contract ei sut tetg vegn jeu era a communicar quei.» Peter Brügger gi dad esser cunscients dalla muntada turistica che l’ustria da muntogna ha per Breil. El ha fatg attent che la Gastro Event SA meini era las ustrias Surselva el vitg da Breil e duront la stad l’ustria sper igl indrez da minigolf. «Vi da quei semida per il mument nuot.» Per motiv da vendita dalla ustria fa Peter Brügger valer motivs familiars.

Letras grassas

L’ustria da muntogna Burleun respectiv siu possessur ein gia stai el focus dalla publicitad avon dus onns. Pervia dad ina sentenzia en connex cun falsificaziuns da documents e cugliunarias professiunalas ha il possessur stuiu sepresentar avon ina dertgira bernesa. Sco quei che RTR ha rapportau avon dus onns ein ils donnegiai dalla cugliunaria secunvegni cun il delinquent che quel paghi anavos la summa da delict enteifer in cert temps.

Rapportau han las medias avon dus onns dad ina summa da delict da varga sis milliuns francs. Sche la vendita actuala dalla ustria Burleun stat directamein en connex cun la sentenzia davon dus onns ei incert. A quella damonda ha era il representant giuridic dils donnegiai Jürg Wernli buca saviu rispunder sin damonda dalla FMR.

S’exprimius cuort en caussa ei era il president communal da Breil Roman Flepp. El ha getg alla FMR ch’il Burleun seigi fetg impurtonts per la vischnaunca. Ed ei seigi propi buca tuttina co ei mondi vinavon cun quell’ustria. La suprastonza communala spetgi cun attenziun tgi che vegni a cumprar il Burleun che seigi impurtonts pervia da sias capacitads igl unviern, ussa denton era cul concept da stad dallas pendicularas. In concept che fa reclama cun sentiments da primavera. Entochen ch’ils possessurs dall’ustria han anflau ina cumprader ston ils hosps aunc prender cun sez il puschegn per guder la biala vesta dalla terrassa dil Burleun.