Quatter uras brass cun mariners ed eskimos

Cun energia fanfarica ha cumanzà il concert da sonda passada da la Musica Concordia Müstair, cun «Energy» dal cumponist Norbert Pfammatter. Forsa esa stat precis quel sforz d’energia cha la musica ha dovrà per seis concert da prümavaira. «Nus eschan stats sforzats da chattar ün’otra soluziun quist on per nos concert, causa cha’l contuorn da la sala da scoula es in fabrica», ha declerà la presidenta da la società da musica, Fadrina Grond, in seis salüd.

Trais jadas plü grond

La Musica Concordia Müstair ha pudü far adöver perquai dad üna halla da producziun da l’impraisa Lico. Quella firma prodüa a Müstair fuonds da cucun ch’ella exportescha in tuot l’Europa. E la «nouva» halla da concert da la Concordia es perfin var quatter jadas plü gronda co üna normala sala polivalenta.

Pervi da la müdada da località, ha Fadrina Grond, chi ha eir moderà in möd biling tras il concert, annunzchà cun ün surrier cha la saira pro la Lico «sarà amo plü variada co üsità».

Minchülettas, mariners e «hot stuff»

Da la variaziun nun haja pelvair na mancà dürant il concert dad ün’ura. Da l’energia iniziala esa it inavant cun taimpra da prümavaira i’l toc «Springtime», cun ün solo da posauna sunà cun ligerezza da minchülettas da Jeremias Donchi.

Lura es seguida la part principala dal concert cun arrandschamaints musicals da melodias cha blers cugnuoschan. Tanter oter cun «The Wellerman», la chanzun da mariners chi’d es statta i’ls ultims ons ün hit illas medias socialas. In singulas passaschas han las musicantas ed ils musicants da la Concordia perfin sumsumà e chantinà.

Eir il medley da James Bond – cumpilà dal cuntschaint arrandschader da brass Goff Richards – sarà it giò sco zücher pro las var 300 persunas illa halla. Divertent e surprendent es eir stat il drink-mix dal disco-hit «Hot Stuff» da Donna Summer cumbinà cul famus chanson «Eskimo» da Mani Matter.

Tola in tuottas culurs

Plainamaing fidela a la musica da brass ha la Musica Concordia lura preschantà duos arrandschamaints chi savuran da las ragischs da quel stil da musica chi deriva da la Gronda Bretagna. La Concordia chi exista daspö 129 ons chüra fingià daspö var 40 ons il brass, la musica sunada be d’instrumaints da tola.

Pro la cuntschainta ballada d’amur «The Rose» han ils differents registers da tola dat in man ün a tschel la rösa. E pro la melodia populara «London Darry Air» han Heiner Cueni e Lucas Andri rasà oura cun lur eufoniums la bell’increschantüm irlandaisa.

Fini seis concert da prümavaira ha la Musica Concordia in stil tradiziunal, ma na main divertent grazcha a la «Trompetenpolka», üna polca super-svelta e virtuusa pels tschinch cornetists solists. Il public es stat inchantà. Forsa eir dal fat cha «sia» Concordia as preschainta darcheu in excellenta fuorma, davo cha la società füss bod gnüda scholta avant pacs ons. Cul retuorn da l’anteriur dirigent Roberto Donchi e cun qualche rinforzamaint dal Tirol dal Süd es la Musica Concordia darcheu in plaina flur, cun ün ensemble bain equilibrà, cun üna preschantaziun sgüra ed ün dirigent chi nu dà our d’man las mastrinas.

Sunar var quatter uras

Davo ils tuns svelts da polca e davo ün supplemaint nun es la sairada nimia amo statta a fin. Tenor la devisa: Davo il concert es avant il concert! La Musica Concordia ha nempe fat plazza vers las 22.00 ad ün’otra fuormaziun da brass da vaglia chi ha sunà e tratgnü fin aint pella not. La pitschna gruppa «Grenzenlos» es boemiana (Böhmische Formation) e’s cumpuona da set musicantas e musicants: trumbettas, baritons, posauna, tuba e battaria. Ils giuvens da tanter 20 e 30 ons vegnan da tuot las varts da la regiun da cunfin tanter Austria, Italia e Svizra. In lur concerts da trategnimaint sunan els ün repertuar vast – da polcas e marchas fin a rock e pop.

Ün dals set musicants da «Grenzenlos» es Silvan Fallet da Müstair, il prüm-cornetist da la Musica Concordia. «Id es propi ün gaudi da sunar in quista fuormaziun, eir scha quista saira esa vaira dür per mi’imboccadüra, cun güsta duos concerts ün davo tschel», ha’l manià in sonda saira. Davo il concert da la Concordia ha Silvan Fallet nempe sunà amo bod trais uras inavant cun quista gruppa boemiana – da l’imni südtirolais «Bozner Bergsteigermarsch» fin a «Hey Jude» dals Beatles.

Quels dal public chi sun restats amo fin aint per la not, chantaivan per part süllas maisas – eir amo davo avair tschüf üna purziun da quatter uras brass. In sala da gimnastica da la scoula nun es quai capità suvent.