Negin credit per sanar la patinera

La suprastonza communala da Mustér ha dumandau il cussegl da vischnaunca per in credit dad 1,1 milliuns francs per sanar cumpleinamein ils indrezs per la patinera el Center Fontauna. A quella damonda ha il parlament buca dau suatientscha il gliendisdis sera. Medemamein ha el refusau la damonda per in credit per indrezs per activitads da stad silla surfatscha dalla patinera.

Negin glatsch ils proxims unviarns

Sco la vischnaunca scriva en ina communicaziun als mieds da massa vegn ei aschia buc a dar in glatsch artificiala a Mustér ils proxims onns. «Con ditg che quei vegn ad esser il cass savein nus buca dir. Sin fundament dalla decisiun dil cussegl da vischnaunca vegnin nus ussa a stuer spitgar cun quei project», di il canzlist communal Roland Cajacob. Ils motivs dil cussegl da vischnaunca da refusar il credit ein stai il giavisch d’integrar la patinera en ina secunda etappa dil project cumplessiv da sanaziun dil Center Fontauna e plinavon d’analisar variantas alternativas per in glatsch artificial.

Indrezs en schliet stan

Ils indrezs per la patinera artificiala el Center Fontauna ein vegls. Sco la suprastonza communala ha orientau il cussegl da vischnaunca dat ei permanentamein disturbis cun quels. «Sut quellas circumstanzias eis ei buca pli pusseivel da porscher in glatsch artificial sigl areal dil Center Fontauna», constatescha l’executiva. Il concept da sanaziun presentaus al parlament il gliendisdis sera haveva la finamira da renovar tecnicamein gl’indrez, optimar el economicamein e medemamein adattar el als basegns actuals. In element central era medemamein da reducir la surfatscha dil glatsch per rodund 20 %. Medemamein fuss la surfatscha dalla plazza da ballapei vegnida reducida. Silla surfatscha reducida fuss vegniu purschiu il glatsch igl unviern e novs elements da divertiment la stad sco paddle e pickleball.

Investiu dameins che previu

Il cussegl ha approbau il quen communal e rapport annual dalla vischnaunca digl onn 2025. Il quen da menaschi siara cun ina sviulta da 18,8 milliuns francs ed in gudogn da rodund 280 000 francs. Il grad d’atgna finanziaziun importa 1,88 milliuns francs. Il quen d’investiziun muossa in maletg nunusitau. Las entradas survargan per ina ga las expensas dallas investiziuns. La vischnaunca ha fatg investiziuns dad 1,2 milliuns francs, ils recavs contonschan la summa da bunamein 1,4 milliuns francs. «Tier quels recavs setracta ei da contribuziuns dil Cantun e d’autras organisaziuns che la vischnaunca ha retschiert igl onn 2025 per projects dils onns vargai», scriva la vischnaunca en ina communicaziun las mieds da massa. El preventiv pigl onn 2025 quintava la vischnaunca cun investiziuns da 3,9 milliuns francs, pia in bien ton dapli che las investiziuns fatgas effectivamein. Sco la suprastonza communala communichescha han plirs projects per exempel da vias communalas, canalisaziuns ni era in’emprema part pil project d’avertura dalla Val Segnas ed igl Uaul Run buca saviu vegnir realisai.