Concert cun ligerezza ed ardur

Il Cor masdà Ardez es gnü fundà dal 1965 sün iniziativa dad Alfons Clalüna. Ad Ardez existivan fin lura duos cors, il cor viril ed il cor da duonnas. Per ir a la Festa federala da cors masdats a Samedan s’han units ils duos cors al Cor masdà Ardez. In dumengia passada han las preschaintas ed ils preschaints giodü ün concert cun chanzuns our d’ün repertori vast in diversas linguas. Il Cor masdà Ardez suot la bachetta da Gyula Petendi ha satisfat cun üna cultura da tun fich omogena e cun buna dinamica. Eir scha’ls tenors ed ils bass d’eiran preschaints be cun mincha jada trais homens nu sun quellas vuschs idas suot invers ils soprans ed alts da la duonnas. Satisfat ha cha tuot las quatter vuschs d’eiran bain preschaintas sainza ch’üna da quellas vess dominà. Ils segns precis dal dirigent han pisserà per üna buna ritmica ed ün chant liger. Eir ils tuns ots dal sopran sun gnüts superats in möd cumpetent.

Program varià

Il president dal Cor masdà Ardez, Duri Mengiardi ha salüdà als preschaints. «Ün salüd special va a duos cumponists chi sun hoz preschaints pro nus. Ün es Gion Andrea Casanova chi’d es gnü aint da la Surselva per dudir duos da sias cumposiziuns cha nus chantain hoz qua. Tschel es nos vegl magister Alfons Clalüna chi ha scrit divers texts impustüt eir per chanzuns da Peter Appenzeller.»

Cumanzà ha il concert cun üna «Intrada a capella» dad Henry O. Millsby tenor üna melodia our dal 17avel tschientiner seguida d’ün toc in lingua francesa «Partons tous, bergers» da Jacques Brel. La terza chanzun da Gion Andrea Casanova e cun text dad Arnold Spescha cul titel «Himni al sulegl» ha tunà uschea sco cha Rumantschs s’imagineschan üna chanzun our da lur stret ravuogl. La quarta chanzun cul titel «Ein Gleiches» da Peter Michael Riehm e cun ün text da Wolfgang von Goethe ha rapreschantà eir la lingua tudais-cha. La chanzun «Mai», fich melodiusa, scritta dad Armon Cantieni cun text da Men Rauch ha muossà üna jada daplü cha’ls Rumantschs nu s’han da zoppar cun cumposiziuns rumantschas. Eir melodiusa d’eira la chanzun «Giuvna amur» da Flavio Bundi cun text da Riget Bertogg.

Cunquai cha tuot las audituras ed auditurs han surgni pro l’entrada ün fögl cun indicaziuns culs titels da cumponists e textaders e culs texts da tuot las chanzuns hana pudü giodair las chanzuns amo tant daplü.

Intermezzo cun Reinhard Schöpf

Illa mità dal concert han las preschaintas ed ils preschaints giodü ün intermezzo da Reinhard Schöpf. Il magister da musica dal Vnuost suna plüs instrumaints. Pel concert ad Ardez ha el tschernü tocs pella guitarra classica. «Per mai es l’invid da meis collega da musica Gyula Petendi da sunar ün pêr tocs üna gronda onur. Eu n’ha tschernü quatter tocs spagnöls pella guitarra, il prüm cul titel ‹Sueno›, ‹Traum› obain ‹Sömmi›», ha el fat a savair. El ha fat üna bella punt cun classica spagnöla cun ün indschegn da la dainta impreschiunant, parts lommas seguidas dad otras cun schlantsch dovrond tuot il culöz da sia guitarra. L’auditori ha stimà seis intermezzo cun grond applaus.

Chanzuns rumantschas
pella terza part

La terza part dal concert ha cumanzà cun üna cumposiziun dal dirigent e manader dal Cor masdà Ardez, Gyula Petenti cun text da Peider Lansel. La gronda part dal toc in mol adüna cun üna finischun in dur. Ils prossems duos tocs d’eiran cun texts dad Alfons Clalüna chi’d es stat preschaint al concert, cun musica da Peter Appenzeller. Tuottas duos chanzuns nu sun simplas per chantar ed han pretais gronda abiltà e precisiun cun cuortas dissonanzas vuglüdas. «Aurora» da Gion Andrea Casanova cul text dad Arnold Spescha ha muossà cha eir il sursilvan ha chattà la via in baselgia ad Ardez ed ha confirmà cha rumantsch es e resta rumantsch. E la chanzun «Di’m, esch tü amo qua» da Linard Bardill cun text da Madlaina Stuppan, arrandschada per cor da Gyula Petendi ha surgni seis applaus merità.

Las preschaintas ed ils preschaints han giodü bundant ün’ura chant da buna qualità chi ha eir muossà cha’ls Rumantschs nun han da’s turpiar da lur lingua materna chi’d es adattada eir per chantar.