Tgi suonda a Beatrice Baselgia?

La regiun dil Plaun/Imboden includa siat vischnauncas. Ferton che Favugn, Tumein, Trin e Flem ein uni el circuit dil vegl cumin da Trin, fuorman tschellas, Domat, Panaduz e Razén, il circuit Razén. Malgrad che quella vischnaunca ei la pintga dallas treis, dat il casti impurtonza ad ella. Gl’onn 1819 ein Domat, Panaduz e Razén secumpradas libras digl imperi austriac. La liunga epoca austro-habsburghesa ha denton influenzau la politica conservativ-catolica aunc varga 200 onns. Gl’onn 2022 eis ei gartegiau, grazia al niev sistem d’eleger tenor proporz, da lomiar las structuras cementadas.

La profilada

Ils 15 da matg 2022 ha il proporz mischedau dil tuttafatg niev las cartas a Domat, Panaduz e Razén. Cun 13 600 habitontas e habitonts eis ei il quart-grond dils 39 circuits d’elecziun dil Grischun. Avon occupava l’anteriura PCD – oz fusiunada culla PBD el Center – sis dils siat sezs. In da quels ha Beatrice Baselgia, l’anteriura presidenta communala, occupau vigurusamein dapi 1994, cun interrupziun da 2000 tochen 2003. Ella ha battiu, savens persula, consequentamein pils interess socialdemocratics dils luvrers e per la giustia sociala. La deputada ei stada ina petga franca en vischnaunca, el cumin e circuit. Ed era el parlament han ins tedlau e stimau ses votums. Ussa ei la presidenta dalla fracziun PS sedecidida da metter a disposiziun siu sez a forzas giuvnas.

Mo dus sut 30 onns

Gest en quei connex dat zatgei denton en egl el circuit d’elecziun Razén: Las forzas giuvnas mauncan per gronda part. Dallas 34 persunas che candideschan ein sulettamein duas sut 30 onns. In da quels ei Cristian Di Donato. Il miradur da 22 onns da Domat candidescha per la partida liberaldemocrata (PLD). La medema annada, numnadamein 2004, ha Anna Sofia Ulber. La specialista da tgira, medemamein da Domat, ei ina dallas siat persunas che candideschan per la partida dil Center. Suenter quels dus candidats da 22 onns suondan quater dallas annadas 1990 tochen 1995, igl ei representants dallas partidas PLD, PS, Verda e Center.

Dus «vegls» ch’ein motivai

Dils siat deputai d’entochen ussa dil circuit da Razén defendan sis lur sezs. Igl ein quei Silvia Bisculm Jörg (SP), Jürg Heini (Center), Erich Kohler (Center), Ronny Krättli (PPS), Reto Löpfe (Center) e Jürg Rodigari (PLD). La dominonza dil Center ei buca pli tema, la situaziun da partenza ei varionta e votantas e votants da Domat, Panaduz e Razén han ina vera elecziun. Secapescha che la PS emprova da defender il sez da Beatrice Baselgia. La concurrenza ei denton gronda.

Reto Loepfe ed Erich Kohler, ein, sco Beatrice Baselgia, era deputai e candidats da num. Els dus «vegls» ein motivai per ina proxima legislatura. Medemamein Ronny Krättli. El ha conquistau avon otg onns in sez ed el vegn a tener quel. Ella vischnaunca da Domat ei gl’um da 46 onns daferton era in um da num e pum. El e Silvia Bisculm Jörg, commembra dalla suprastonza communala, gudognan profil tras la demissiun da Beatrice Baselgia. Denton era il liberaldemocrat Jürg Rodigari contribuescha alla nova varietad politica el circuit da Razén.

Prevesiblamein vegnan las quater partidas Center, PPS, PLD e PS a parter ils siat sezs da quei circuit. Ei pudess denton vertir aunc dapli varietad. Cun duas gliestas d’ensemen siat persunas ein ils verdliberals ed ils verds buc ina unitad. Aschia eis ei grev per ellas da conquistar in dils siat mandats. Fussen els ina partida, havess quella schanzas realas d’augmentar la mixtura politica.