Blera bagnvuglientscha per «Nossa buteia»

Igls 31 da december 2025 ò la Societad da consum Alvra/Surses saro la buteia Prima a Sur, chegl perveia da muteivs economics. Digl 2020 anfignen alla fegn digl 2025 ò chella societad mano igl negozi a Sur, dantant adegna gia da cumbatter finanzialmaintg per star sur l’ava.

Chegl è er sto igls cass digl 2005 anfignen igl 2020, chels 15 onns tgi la Societad Nossa buteia Sur ò mano sen agen chint chel travagl. A Sur ins ò igl fanadour 2025 piglia cunaschientscha tgi la Societad da consum Alvra/Surses sera per la fegn da december la filiala Prima. Ena part digls clients ed indigens ò gia tgapientscha per chella decisiun e l’otra part ò betg gia tant plascheir.

Dalunga tg’è sto ancunaschaint tgi la buteia, tgi sa catta aint igl partera dalla Tgesa communabla a Sur, sera, è sa furmada ena gruppa indigena e da sagonddimorants cugl intent da mantigneir en negozi an vischnanca. Bung nov meis pi tard è igl intent davanto realitad – venderde passo è nia surdo igl negozi «Nossa buteia» uffizialmaintg agl travagl.

Societad cun responsabladad limitada

Per la projectaziun e la realisaziun dalla nova buteia a Sur èn cunzont s’angaschedas cun corp ed olma las dus pouras Victoria Spinas ed Erika Tanner. Aposta per chel intent è nia fundo en team da project cun ellas dus e cun Thomas Nyffeler, en anteriour academicher tgi stat a Marmorera.

Fundada è er neida ena societad cun responsabladad limitada (ScRL), alla quala on cun Victoria Spinas, Erika Tanner e Thomas Nyffeler er appartignia Werner Erb, Letizia Reich-Signorell e Hansruedi Berger. L’amprema incumbensa da chellas persungas è stada da finanztgier igl project dalla «Nossa buteia». Scu tgi Erika Tanner ò detg anvers la FMR ins vegia investia radond 150 000 francs per realisar igl negozi. Igl è er nia fatg igls davos treis meis fitg blera lavour voluntaria cunzont dallas dus iniziantas digl project, ma er da bleras otras persungas indigenas.

50 000 francs digl Ageid svizzer da muntogna

Erika Tanner ò cunzont menziuno igl sustign digl Ageid svizzer da muntogna per la realisaziun digl nov negozi a Sur. La somma da sustign schea tar 50 000 francs. Ena persunga privata vegia sustignia igl project cun ena somma pi gronda, ò punctuo Erika Tanner. Er otras persungas privatas vegian sustignia la realisaziun dalla «Nossa buteia» cun ena somma pi pitschna u pi gronda, chegl tgi seia fitg plaschevel. Sto pussebel seia er da finanztgier igl project cun ena somma tgi vala alloura scu bon per cumprar aint. Bung 25 persungas vegian fatg diever da chella pussebladad. La somma schea cò tranter 300 francs anfignen tar 3000 francs. Donaziuns ins vegia er retschet per realisar la buteia, ò detg Erika Tanner, ed er per chellas seia ella angraztgevla.

Davart digl cumegn da Surses seia nia nign sustign, ma bel seia tgi chel renunztga igls proxims treis onns agl tschains per la localitad. Siva seia igl tschains fixo sen 5000 francs per onn, ò detg Erika Tanner. Ella ò er punctuo tgi las interpresas tgi vegian gia lavour an connex cun realisar igl nov negozi seian stadas generousas cun renunztgier ad ena part digls costs per la lavour fatga.

50 % èn products da bio

Cun vurdar tge tgi sa catta tot segls regals dalla buteia dat an îgl tgi da cumprar dattigl blers products da bio. Erika Tanner dei: «50 % dalla roba tgi vign vandeida è bio.» Ena retschertga fatga tar indigens e giasts da Sur e conturn vegia testifitgia tgi la mesadad giaveischa da cumprar ainten la «Nossa buteia» a Sur tals products da bio. Igls oters products èn roba da mintga de, scu chegl tgi dat da cumprar ainten oters negozis. Da cumprar dattigl passa 4000 products. Ena gronda part digls furnitours èn indigens, cunzont bagns purils dall’antiera regiun ed er oters affars. Igls oters products furnescha la societad Bio Partner e la Transgourmet.

Durant 24 ouras e durant set deis

Digl glindesde anfignen la sonda – dallas 08.30 anfignen las 11.00 – è cun Karin Van Den Heuvel la buteia averta ed er manada. Pussebel è alloura da cumprar aint durant 24 ouras e durant set deis graztga agl autosarvetsch. Antrar e paer è pussebel cun ena carta da credit u cun ena carta dalla banca. Erika Tanner è da bunga speranza e fitg optimista tgi indigens e cunzont turists e giasts fetschan diever dalla «Nossa buteia».

En avantatg seia bagn tgi la buteia sa catta tar la farmada dallas postas ed er aint igl manevel dalla veia naziunala N 29. Ella chinta alloura er tgi igls giasts dall’Alp Flex compran aint a Sur, aint igl negozi noua tg’è digl reminent er andrizzo en pitschen cantung ampernevel per bever café.

An mintga cass venderde passo, tar l’avertura dalla «Nossa buteia» a Sur, ins ò vasia plessas fatschas cuntaintas, cunzont er bleras donnas pi segls onns tg’eran cuntaintas tgi Sur ò puspe ena buteia. Ensatge pi scepticas eran ellas alloura cugl autosarvetsch per paer, persiva èn ellas stadas angraztgevlas digl ageid dallas persungas cumpetentas. Anramada musicalmaintg è l’avertura neida cun tungs d’ena gruppa da tibas da Werner Erb.