Üna residenza per far resunar la regiun
Lorenz Weber es pianist, cumponist e paster chi viva e lavura insè a Berlin. Las ultimas duos eivnas ha’l però passantà a Lavin i’l rom dal proget «artinresidenza». Dürant seis sogiuorn ha l’artist creà la musica per ün film documentar chi purtretescha ün farrer illa Val Fex.
Tanter ün clavazin, ün keyboard electronic e duos microfons vaiva’l installà las ultimas duos eivnas seis lö da lavur, il musicist e cumponist Lorenz Weber. Il musicist e cumponist ha pudü far adöver da la stanza a Lavin cha’l proget «artinresidenza» spordscha (guarda boxa). «Eu d’eira però eir bler in viadi per inscuntrar la glieud da quia ed imprender a cugnuoscher la cuntrada. Per surgnir ün sentimaint, ün’impreschiun da quista regiun», discha’l pro üna visita al penultim di da sia residenza artistica.
Residenzas dessan cuntinuar
La residenza da Lorenz Weber a Lavin es intant la quarta cha la società «artinresidenza LaVin» ha sport daspö l’utuon 2025. L’idea d’offrir ad artistas ed artists ün dachasa temporal per perseguitar ün’idea o lavur artistica, d’eira oriundamaing intenziunada sco üna sort epilog al lö da cultura La Vouta. Quel vaiva serrà la prümavaira passada davo 28 ons sias portas. Culla decisiun da schoglier la società vaivan las commembras e’ls commembers eir decis quella jada al listess mumaint d’ütilisar il chapital restant da la società per sustegner progets artistics.
Intant sun cun quels raps gnüdas offridas daspö l’utuon passà quatter residenzas da duos fin trais eivnas in «La Stalla», üna sort atelier o studio güst suot las anteriuras localitats da La Vouta. Sper l’allogi spordscha la residenza a Lavin eir la veglia cabina da telefon sün Plazza Gronda sco pitschen lö per installaziuns o exposiziuns. Per la paja dà l’artista o l’artist a la fin da sia residenza in ün’occurrenza publica invista in sia lavur, per exaimpel pro üna preschantaziun, üna prelecziun o ün workshop.
Eir scha’ls mezs finanzials surtuts da La Vouta van planet a fin, ha la società da principi decis da vulair cuntinuar cullas residenzas e da tscherchar ulteriur sustegn finanzial per cuntinuar cul proget. Il böt es da promouver il barat e la colliaziun artistica illa regiun, tant sco l’occupaziun tematica culla regiun.
La prosma residenza ha lö fingià da la fin da mai fin mità gün: L’artista Lena Unger as voul dedichar in quel temp a la culur blaua. (fmr/mst)
Chattar il soundtrack da la regiun
Dürant quella residenza ha Lorenz Weber nempe creà la musica pel film documentar «Fexer» dal redschissur Adrian Howell. Quel vain realisà actualmaing i’l rom dal proget «Grischun», üna seria da tschinch films chi dessan purtretar persunas engiadinaisas. Il prüm da quels films, apunta «Fexer», purtretescha il farrer Roger Rominger chi fuschina illa Val Fex curtels da damast exclusivs.
«I’s tratta da chattar ün cling, üna musica chi s’affa culla regiun», disch il cumponist, «per mai funcziuna quai, schi’s guarda üna scena cun musica e nu s’inaccordscha la musica. Scha’l cling e’l cuntgnü d’üna scena s’unischan.»
Da chattar e s-chaffir quista colliaziun tanter film e musica – cha quai füss stat greiv be our da la distanza, suppuona Lorenz Weber. Tant plü important saja stat per el quista residenza a Lavin. «Eu stögl esser sül lö per sonorisar üna regiun», discha’l. «Eu nu less be far musica illa stüva choda, perquai suna la bunura adüna i a lavurar sün ün bain da chavals a Samedan, sun suvent eir chaminà tras la cuntrada e n’ha imprais a cugnuoscher ils protagonists dal film.»
Las impreschiuns ha Lorenz Weber lura transmüdà tanter clavazin, keyboard e laptop in musica. «Quai es ün process magara lung per tscherchar il cling adattà. Lura sezza quia e prouv oura, guard che chi funcziuna, che chi tuna bain, che chi exprima quell’impreschiun ch’eu n’ha absorbà.»
«Sco ün’odur chi resta in regordanza»
Illas duos eivnas ch’el ha passantà a Lavin haja’l uschea creà raduond 50 differents tocs pel film documentar «Fexer», quinta il pianist e cumponist. Pro la visita in seis studio temporal a Lavin preschainta’l melodias da clavazin ed electronicas calmas, reservadas e modestas. «Quista musica es quieta, nun ha suvent ingün ritem e dà bler spazi», declera’l. «I’s tratta da sustegner il film, na da til stumplar in üna tscherta direcziun o da colportar l’aigna opiniun davart quai chi vain muossà.»
Principialmaing voul il cumponist crear per tuot il proget da film ün accumpagnamaint musical cun ün caracter unic. «Hozindi as dschessa ün ‹signature sound› – musica na per üna scena definida, ma plütöst per ün’atmosfera distinta», disch Lorenz Weber. «La musica dess esser sco ün’odur chi resta in algordanza.»
Observaziuns dal minchadi in üna regiun plain cuntrasts
«Fexer», il prüm film da la seria previssa cun tschinch episodas, es intant fingià sviluppà magara inavant. Üna versiun cuorta dal film es gnüda muossada illa preschantaziun a la fin da la residenza in sonda saira.
Sco cha’l redschissur Adrian Howell declera, es intant eir il seguond film in producziun. El accumpogna dürant ün on il paur Adriano Coretti da Segl chi surpiglia il bain da famiglia. «L’idea da quist proget es da muossar co cha la glieud da la regiun viva in quist cuntrast tanter il minchadi e’ls svilups globals chi’s muossan eir quia», declera il redschissur. Il minchadi cun lingua, artischanadi e möd da viver genuin in vista ad influenzas globalas ed ün turissem exclusiv e minchatant superficial. «L’intent dal proget es da simplamaing muossar co cha la glieud va intuorn cun quista situaziun», disch Adrian Howell, «d’observar quel svilup, ma na da til commentar o valütar.»
La seria «Grischun» es eir ün proget da film our d’üna perspectiva externa sülla regiun. Il cumponist Lorenz Weber ha imprais a cugnuoscher la regiun uossa in sia residenza a Lavin. Ed Adrian Howell, il redschissur oriund da la Gronda Bretagna, viva intant daspö favrer quia. «I nu’m va perquai da romantisar alch, ma da simplamaing documentar la vita in quista situaziun da tensiun.»
Gust da leger dapli?