Tge aventura acustica

L’ideia d’en grond concert da tiba a Lai dereiva da Reto Guidon, el tg’è sez en passiuno sunader da tiba. Cugl sies amei Giorgio Soldini, tgi so mademamaintg far musica cun la tiba, e cun la gruppa da tiba dalla Societad da musica Vaz, ò Reto Guidon, tg’è da Latsch e stat a Coira, organiso avant tschintg onns per l’amprema geda en concert da tiba a Lai. Siva digl resung extraordinari positiv sen l’amprema realisaziun ò gia li sonda passada la 5avla ediziun digl concert da tiba.

Reto Guidon è sa musso ple tgi cuntaint digl domber da sunatibas tgi èn sa participos. El ò detg anvers la FMR: «S’annunztgias èn radond 50 participants e participantas betg angal dalla Svizra mabagn er dalla Germania e Frantscha». Igl organisatour principal è sto ple tgi angal cuntaint tg’en domber considerabel da sunatibas on catto la veia a Lai. Sur las medias socialas anveida el agl concert da tiba a Lai, tarmetta varsaquants flyers e menziunescha adegna puspe tranter collegas tgi sungan er tiba igl concert da tiba sot tschiel avert a Lai sen igl «Bossi Hang» anmez vischnanca. Igl om da 74 onns da Coira sunga siva digl 2010 la tiba, igl ple scu solist pero adegna puspe er ainten ena gruppa. Reto Guidon dei tg’ena gronda part digls sunatibas fetschan igl ple musica ainten ena furmaziun da dus anfignen tschintg sunatibas.

La tiba scu simbol per la cultura svizra

Da mezde èn sa radunos adegna daples sunatibas sen la terrassa digl hotel Spescha a Lai. I rigia ena relaziun lucca e spontana tranter persungas da madem meini. Sen la dumonda schi mantga betg la generaziun giovna ò Reto Guidon managea: «Surtot aint igl Grischun mantga la generaziun giovna da sunaders da tiba, perancunter an Svizra Centrala incanta igl instrumaint adegna daple gliout giovna». Tranter igls radond 50 sunatibas tg’èn sa participos all’occurrenza a Lai era igl grond domber bagn passa 60 onns. La tiba stat er scu simbol per la cultura svizra, ma er per usits e cunzont pigl tung dallas muntognas. La tiba vign duvrada siva d’en pêr onns betg angal ainten la musica populara, numnadamaintg er ainten la classica e perfign aint igl jazz. Igl instrumaint naziunal stat naturalmaintg er per la colliaziun cun la nateira e sa tgapescha er per la veta purila. Legreia, cuntantientscha, star da cumpagneia e bler plascheir on betg mantgea agl concert da tiba a Lai.

Plascheir ò Guidon er gia digl grond domber da sunatibas. El ò managea cun en reir tgi adegna daple donnas cattan plascheir ve da chel instrumaint. «Pertge saia betg exnom deir, plascheir vaia tuttegna», uscheia Reto Guidon. Pinavant ò el rachinto tgi vigna igl ple suno an treis vouschs e fitg darar an quatter vouschs, chegl tg’è er sto igl cass agl concert da tiba a Lai.

Chor cumplessiv impressiunont

Punct culminond incontesto è naturalmaintg sto igl concert da tiba, pi precis allas 13.00 ed allas 15.00 segl «Bossi Hang». Igls 50 sunatibas on furmo en chor cumplessiv imposant tgi’ò fatg resanteir la forza e l’emoziun digl sunar la tiba an moda e maniera impressiunonta. La preschentaziun impressiunonta sot la batgetta da Michael Hirt e This Stoop ò betg angal incanto igls numerous giasts ed aspectatours, mabagn è er stada per mintga singul choral ena veira experientscha. Igls stupents tungs digl chor cumplessiv sa derasavan sur l’antiera vischnanca ed uscheia splendurava da taimp an taimp er igl suglegl, era igl tung schi ampernevel, impressiunont e survantschia scu las dus preschentaziuns. Igl concert da tiba è sto la miglra reclama per igl inscunter da tiba a Lai tg’ò li la stad 2027.