Tier igl freid on igls peschs mors

A Salouf è la tgatscha ple u manc igl antier onn en tema. Digl matg anfignen alla fegn d’otgover è alloura er la pestga en tema permanent. La vischnanca oradem Surses è ainten la regiun er egna dallas unicas cun en club da pastgeders. Chel dattigl siva digl 1992 e da preschaint ò el 30 commembers. President digl Club da pastgeders Salouf è igl mument Nico Demarmels.

La concurrenza da pastger interna chella totga tar egna dallas impurtantas activitads digl club da pastgeders. Li ò chella adegna d’Anzainsas, uscheia er l’emda passada. Igl taimp da pastger è limito. Chel scumainza allas 5.00 e cozza anfignen allas 15.00.

Agl Lai da Marmorera ed agl Lai da Burvagn

La concurrenza da pastger sezza, ella stat bagn aint igl center, ma la cumpagneia, igl divertimaint e la legreia è gist schi impurtanta. Digls 13 participants ò la gronda part pastgea agl Lai da Marmorera ed agl Lai da Burvagn. L’egn u l’oter ò pastgea per lung d’en ragn, chegl tranter Beiva e Salouf. Digls 13 pastgeders on set gia success e turnos a tgesa cun aglmanc en pesch u er daples peschs. Tgappos èn nias an tot 12 peschs. Da chel domber ò igl victour dalla concurrenza da pestga Daniel Sonder gist tschif quatter peschs. Pastgea ò igl pastgeder da 61 onns agl Lai da Marmorera. Anvers la FMR ò el detg: «Las temperaturas per pastger eran tot oter tgi idealas cun esser fitg freid, en vent immens e temporarmaintg navevigl». Per bunga sort veva en oter pastgeder aint igl lascher en bung vinars dad ervas, uscheia tgi cun bever da chel ins vegia gia ensatge pi tgod, ò igl victour detg cun en surreir. Igl amprem digls quatter peschs ò Daniel Sonder tgappo allas 5.20 ed igl davos allas 9.10.

A pastger vo igl victour dalla concurrenza da pestga vers 40 onns ed an chels quatter decennis ò el er tgappo savens igl domber lubia per de. Daniel Sonder ò er gudagnea plessas gedas la concurrenza da pestga interna digl Club da pastgeders Salouf e vetiers èn er nias anc varsaquants plazs da podest. Tiers las relaziuns pitost malangraztgevlas, gist chegl tgi pertotga igl clima, è igl domber digls peschs tgappos cun 12 tocs migler tgi anc avant en onn cun en domber da 9 peschs. Igl pi grev pesch, chel ò tschif Simon Sonder agl Lai da Burvagn, ena litgiva da 520 grams cun ena lunghezza da 35 centimeters. Remarcabel è bagn tgi chel pesch era angal per 14 grams pi lev tgi tot igls quatter peschs da Daniel Sonder cun en peis total da 534 grams. Per la rangaziun vala igl suandont: per pesch dattigl 10 puncts e per 10 grams dattigl mintgamai 1 punct.