«Mintga naschientscha ei ina miracla»

«Mintga naschientscha ei ina gronda miracla per mei», di Prisca Collenberg-Bivetti che viva cun sia famiglia a Lumbrein. Avon che daventar spindrera ha la dunna oriunda da Samedan fatg in emprendissadi ella branscha da farma e sco tgirunza da malsauns. Igl emprendissadi da spindrera pli tard seigi staus siu grond siemi desiderau, manegia ella. «Igl ei mia gronda motivaziun d’astgar accumpignar dunnas cun tut lur damondas e spetgas duront lur temps da gravidonza. Mintga naschientscha ei impressiunonta per mei, era perquei che la dunna sezza muossa ina prestaziun corporala immensa en quella situaziun. Ed il punct sigl i ei naturalmein la naschientscha dalla poppa ni dil pop.» In mument fetg captivont da sia lavur seigi denton quel dil temps da pigliola dad otg jamnas suenter la naschientscha. Ei seigi bi d’astgar cumpignar la mumma, igl affon e la giuvna famiglia insumma, raquenta Prisca Collenberg-Bivetti che ha sezza quater affons.

Dapli che mo ina viseta

Pli baul era la lavur dalla spindrera quella d’assister allas naschientschas a casa. Oz succeda ina gronda part dallas naschientschas els spitals. La spindrera Prisca Collenberg-Bivetti accumpogna sper sia lavur el spital las dunnas en speronza avon e suenter la naschientscha. «Ei dat dunnas che han problems corporals ella pigliola, sco per exempel mal il dies. Suenter la naschientscha segidel jeu cun tuttas damondas dil temps da far pigliola. Ina damonda frequenta ei per exempel la moda e maniera dil nutrir igl affon cun dar sezza latg ni autras damondas da sanadad dalla mumma e digl affon.»

Mintga pigliola ei speciala

«Jeu haiel viu biaras naschientschas d’affons en tut ils onns ch’jeu lavurel sco spindrera. E mintgina ei autra e mintgina ei in misteri», di Prisca Collenberg-Bivetti. «Sper tut las situaziuns legreivlas hai era dau situaziuns trestas ch’in affon nievnaschiu ei morts. Quei ei fetg tragic ed era jeu vegn tresta cura ch’jeu patratgel vid quels muments. Jeu stoi denton funcziunar ed accumpognel lu la famiglia senza igl affon duront las jamnas da pigliola.» Quellas situaziuns muntien ina gronda sfida per la famiglia, mo era per ella sco accumpignadra ni spindrera. «Quellas situaziuns ni era sch’ina mumma survegn ina depressiun postnatala suenter la naschientscha drova la spindrera sia savida psicologica ed organisatoria per cattar la dretga via.»

Babs activs

La spindrera Prisca Collenberg-Bivetti di che la naschientscha d’in affon seigi en emprema lingia in mument intensiv per la mumma ed igl affon. Mo era ils babs seigien adina involvi. «Ozildi han ils babs per cletg era 14 dis libers supplementars per segidar cunzun suenter la naschientscha. Jeu haiel viu babs che sustegnan il pli emprem temps fetg bein lur consorta cun haver quitau dils ulteriurs affons, cun lavurs el tenercasa ed aschia vinavon.»

Las jamnas suenter la naschientscha el spital cun la dimora da dus ni treis dis va Prisca Collenberg-Bivetti ina gada a di sperasvi tier la famiglia che ha engaschau ella. Ella fa differentas controllas e rispunda allas biaras damondas che cunzun la mumma ha ils emprems dis. Ils dis suenter la naschientscha d’in affon san denton era caschunar stress. En situaziuns fetg criticas haiel jeu era gia stuiu encurir agid interdisciplinar cul miedi ni cun autras collegas per sustener pli bein la famiglia. Sco spindrera lavuran ins persula. En muments difficils gidein nus ina l’autra cun differents tips  ed empruein da dar sustegn viceversa.

Ginecologa intermediescha

Il survetsch d’accumpignament per dunnas avon e suenter la naschientscha da Prisca Collenberg-Bivetti vegn intermediaus sin giavisch dalla ginecologa ni dil miedi ginecolog. Ei dat pliras spindreras en Surselva che porschan era survetschs semeglionts. Tenor Prisca Collenberg-Bivetti sappi ins cliccar sin la pagina d’internet www.hebamme.ch, indicar igl agen liug da dimora e lu eruir tgei spindrera che stetti a disposiziun per l’atgna vischnaunca.