Lectura Rumantscha

Il cartel sto pajar

Per la cumissiun da concurrenza (WEKO) èsi allegraivel, per ils tirafils dal cartel da bajegiar en l’Engiadina Bassa ina dischillusiun. Il Tribunal federal ha numnadamain refusà il recurs cunter las multas per cunvegnas da pretschs nunlubidas. Las trais interpresas involvidas ston perquai pajar chastis da fin 2,4 milliuns francs – ed il cas po suenter 14 onns finalmain vegnir mess ad acta.

Tematicas delicatas a Turitg

Rumantschas e Rumantschs datti ina massa a Turitg. Quai è enconuschent e sa mussa er en il parlament chantunal. Tschintg da 180 parlamentaris e parlamentarias discurran rumantsch. Envers la FMR èn ellas ed els s’exprimì areguard ils temas che fatschentan actualmain parlament e populaziun: il scandal en la chirurgia da cors a l’Universitad da Turitg e l’introducziun da classas da promoziun per uffants cun difficultads d’emprender.

Badugn empè da plastic

In grond fan da plazzas da ballape artifizialas na sun jau mai stà. Almain cura ch’i va per la liongia, preferesch jau l’odur da pastg e terratsch. La nova plazza artifiziala a Glion Fontanivas para dentant empermettenta. Sco ch’ils responsabels sincereschan numnadamain, garanteschia il nov sistem cun granulat da badugn ina buna qualitad da gieu. Cler, l’odur da pastg vegn er a mancar al nov tarpun – ma forsa ch’igl odura persuenter da badugn?

A revair e bun divertiment cun la Lectura Rumantscha!