Sentenza finala cunter cartel da fabrica

Davo 14 ons cha la cumischiun da concurrenza (Weko) ha instradà las inquisiziuns cunter 19 interpraisas da fabrica da l’Engiadina Bassa in connex cun cunvegnas da predschs, po il cas finalmaing gnir miss ad acta. Il Güdisch federal ha tenor üna comunicaziun da medias nempe refüsà il recuors da las trais interpraisas da fabrica involvadas, la gruppa Foffa Conrad, la Lazzarini SA e la Koch SA Ramosch.

Success per la Weko

Cha’l Güdisch federal haja uossa finalmaing dat radschun in chosa cartel da fabrica Engiadina Bassa saja ün fat ourdvart allegraivel pella cumischiun da concurrenza. «Quist es stat ün lung viadi fin qua. I’s tratta quia nempe dal plü grond cas da cunvegnas da predschs i’l sectur d’acquisiziun cha nus vain scuvri fin uossa. Nus eschan ouravant tuot satisfats ch’illa sentenza vegna danouvamaing confermà cha las cunvegnas da predschs sajan gnüdas fattas in möd sistematic ed intenziunadamaing», declera il vicedirecter e manader da la secziun da fabrica Weko, Frank Stüssi sün dumonda da la FMR ed agiundscha: «Ün punct chi’d es adüna darcheu gnü contestà da tschertas interpraisas involvadas.»

Multas da milliuns

Quista sentenza es uossa finala. Uschea chi’d es uossa cler cha la gruppa Foffa Conrad ha da pajar üna multa da passa 2,4 milliuns francs, la Lazzarini SA üna da passa 2 milliuns francs e la Koch SA Ramosch üna da passa 180 000 francs. Quai davo cha quistas trais interpraisas vaivan in seguit a las sancziuns da la Weko dal 2018 fat recuors, il prüm davant Güdisch administrativ federal e lura davant Güdisch federal. Eir scha’l Güdisch administrativ federal vaiva quella jada dal 2023 sbassà las sancziuns da la Weko per las interpraisas involvadas, es il recuors gnü invià, tant dal Güdisch administrativ federal, sco eir uossa dal Güdisch federal.

Chi s’haja tut la sentenza per cugnuschentscha, haja gnü nom sün dumonda pro la gruppa Foffa Conrad. Tour però posiziun in chosa nu’s vöglia. Simil tuna quai eir pro la Koch SA Ramosch. Quia agiundscha Jachen Andrighetti, commember da la direcziun e cussagl administrativ da l’interpraisa: «Davart la sentenza suna gnü a savair our da la comunicaziun da pressa, perquai nu vulessa neir tour posiziun in chosa. Quai ch’eu poss però dir – e quia discuorra unicamaing per noss’interpraisa – nus eschan dischillus da la decisiun. Quai siond cha nus eschan persvas dad esser aint il dret. Uschigliö nu vessan nus fat quist pass s’inclegia.»

Üna decisiun da grond’importanza

Eir scha’l Güdisch federal tegna vi da l’otezza da las sancziuns – voul dir plü bassas co’l chasti cha la Weko vaiva da seis temp oriundamaing impuonü – nun haja quai ingün’influenza sül fat cha quista sentenza saja ün scuess tras e tras per la lavur da la Weko. «Eir scha nus eschan da l’avis cha las sancziuns vessan stuvü esser plü otas, esa al listess mumaint da dir cha sancziuns dessan eir adüna avair ün effet preventiv», uschea Frank Stüssi plünavant, «quia nu vaja be per l’otezza sco tala da las sancziuns.»

Cha plü important saja inamöd il fat cha la sentenza dal Güdisch federal gnia a la listessa conclusiun sco la Weko, nempe chi saja gnü fat consciaintamaing abüs cunter il dret da cartel e quai sur plüs ons. E cha’l fat cha quista decisiun dal Güdisch federal saja gnüda tratta d’ün gremi da tschinch persunas muossa a la fin eir l’importanza dal cas. «Scha tschinch persunas trattan ün tal cas, vuless quai dir chi’s piglia la situaziun fich seriusa. E quia as poja ir our dal fat cha quista decisiun es üna decisiun directiva cun consequenzas eir per oters cas giuridics in avegnir.»

E tals cas sun pendents amo inchüns pro la Weko, tant in Grischun sco eir in oters lös in Svizra.