Bgeras annunzchas pel Premi Travers 2026

Chi succeda a Selma Mahlknecht ed Asa Hendry pel Premi Travers Zuoz 2026? Que vain fat cuntschaint düraunt la seguond’eivna da gün. Fin als 15 meg 2026 as ho que pudieu inoltrer idejas e concepts chi vegnan evaluos düraunt il decuors da las prosmas duas eivnas a fuonz d’üna giuria da tschinch persunas (guarda boxa).

E que chi fatscha ourdvart plaschair tenor ils organisatuors saja il fat cha sun gnidas inoltredas quista vouta in tuot 17 idejas, uschè bgeras scu auncha mê. «Que es ün grand success per nus. In conguel cullas ultimas duos ediziuns vains nus survgnieu mincha vouta ‹be› üna deschina d’annunzchas. Que demuossa eir ün pô cha’l Premi Travers es gnieu pü cuntschaint illa Rumantschia ed eir cha’l renom per quist premi es creschieu düraunt ils ultims ans», managia la mnedra da gestiun da l’Uniun Travers Gianna Olinda Cadonau tuot inchanteda invers la FMR ed agiundscha: «La promoziun ed eir la scena da teater contemporaun vivan!»

2027 – ün grand an da festa

Tscherchedas sun gnidas quista vouta – oter cu illas prümas duos ediziuns dal Premi Travers dal 2022 e 2024 – idejas per ün’inscenaziun rumauntscha cun be üna singula actura u actur sül palc. Dimena ün monolog impè d’ün teater cun püssas persunas, traunter 40 fin maximelmaing 60 minuts, chi vain alura insceno düraunt il Festival Travers Zuoz la sted dal 2027.

Il motiv per quista müdeda ho impustüt eir da chefer cul fat cha düraunt l’an 2027 haun lö in collavuraziun culla vschinauncha da Zuoz, il Lyceum Alpinum Zuoz e la Lia Rumantscha grandas festiviteds e diversas occurrenzas in tuot la Rumantschia. Que a chaschun dal giubileum da 500 ans dal prüm text scrit per rumauntsch, «La Chianzun da la guerra dagl Chiastè da Müs» da Gian Travers. Il Festival Travers Zuoz saro il punct culminant da tuot las festiviteds, però l’inscenaziun dal Premi Travers saro quista vouta be ün da differents puncts d’ün program pü vast. «Perque cha do traunter oter eir ün grand gö liber düraunt il Festival Travers a Zuoz dal 2027, varo il monolog ün’otra paisa e nu saro quista vouta il töch da program principel», declera Gianna Olinda Cadonau inavaunt.

Que saja eir sto il scopo perche cha’d es gnieu incurascho da rester pü simpel illa concepziun e pü pitschen ill’inscenaziun dal monolog. Üna da las idejas dals organisatuors füss cha’s pudess forsa dafatta ir sün turnea cun quist monolog. E cha perque cha tuot saja pü pitschen quista vouta – ed our da motivs da fairness eir invers las idejas chi haun guadagno dal 2022 e 2024 – saja il premi gnieu adatto quista vouta da 15 000 francs sün 10 000 francs.

Plaschair per tuot que chi vain auncha

Davart la varieted da las idejas chi sun gnidas inoltredas nu po e nu vuless la mnedra da gestiun tradir actuelmaing aunch’ünguotta. Be uschè bger: il spectrum saja fich vast, cun idejas per istorgias in püs idioms e skizzas da figüras giuvnas e veglias in situaziuns da partenza fich differentas pellas protagonistas u protagonists. Ed al cumanzamaint da gün as comunichescha alura pü detaglio in chosa – sper l’annunzcha da la vandschedra u il vandscheder, apunto eir davart tuot las otras inoltraziuns.

In mincha cas cuntaintan las idejas per il monolog culla prüma öglieda fich a Gianna Olinda Cadonau. Ella es involveda güst in trais funcziuns düraunt tuot las festiviteds da l’an chi vain. Üna vouta apunto scu mnedra da gestiun da l’Uniun Travers, al listess mumaint scu impiegheda e mnedra da cultura da la Lia Rumauntscha ed alura auncha scu autura principela dal gö liber. Dimena bger da piglier per mauns per ün an da festa remarchabel, na be per l’Uniun Travers, dimpersè per tuot la cultura rumauntscha.

E cha be uschè bger as possa già dir, il töch dal gö liber nu faro ün sguard inavous, dimpersè saro «üna celebraziun dal hoz», conclüda Gianna Olinda Cadonau il discuors sainza vulair tradir neir na cò auncha da memma.

Premi Travers – promoziun culturela

Cul Premi Travers Zuoz promouva l’Uniun Travers – inizio dal 2022 da la vschinauncha da Zuoz, il Lyceum Alpinum Zuoz e la Lia Rumantscha – la lavur da teater contemporauna illa Rumantschia. Quist’occurrenza ho lö mincha seguond an e vo quist an illa terza runda. Fin uossa haun Selma Mahlknecht cun «Üna sbrinzla – üna grotesca otalpina» i’l 2022 ed Asa Hendry cun «Bab, siu archiv ed jeu» i’l 2024.

Las annunzchas da las auturas ed ils autuors vegnan inoltredas mincha vouta in fuorma anonimiseda. Quella u quel chi guadagna il Premi Travers Zuoz ho la pussibilted da svilupper ün scenari per ün töch da teater chi vain alura preschanto mincha vouta düraunt il Festival Travers Zuoz l’an zieva.

La giuria per l’an 2026 consista our da las seguaintas persunas: Selina Beghetto (dramaturga e scienzieda dal teater), Manfred Ferrari (redschissur, mneder artistic Ressort K), Fadrina Hofmann (schurnalista), Rico Valär (scienzio da la litteratura ed intermediatur da cultura) e Roman Weishaupt (teatrist).

Il premi da quist an es doto cun 10 000 francs e vain offert da la Lia Rumantscha e da la vschinauncha da Zuoz. La premiaziun dal Premi Travers Zuoz ho lö quist an ils 27 gün 2026 a las 17.00 i’l Zuoz Globe dal Lyceum Alpinum Zuoz. (fmr/dm)